सामाजिक क्षेत्रातील कार्यकर्ते बाबाजी नामदेव शेगर यांचे निधन

प्रतिनिधी / मोहन शेगर : घोडेगाव येथील प्रख्यात सामाजिक कार्यकर्ते व नारायण कॉम्प्लेक्सचे मालक बाबाजी नामदेव शेगर (वय अंदाजे ५०) यांचे काल (१२ ऑगस्ट) रात्री सुमारे दहा वाजता अल्पशा आजाराने दुःखद निधन झाले. त्यांच्या निधनाने गावासह परिसरात हळहळ व्यक्त होत आहे.बाबाजी शेगर हे नाथपंथी डवरी गोसावी समाजातील एक सक्रिय, उत्साही व लोकाभिमुख कार्यकर्ते होते. त्यांनी आर्थिक, सामाजिक, शैक्षणिक तसेच राजकीय क्षेत्रातही आपला ठसा उमटवला होता. गावातील विविध सामाजिक उपक्रम, धार्मिक कार्यक्रम, तसेच गरजूंच्या मदतीसाठी ते नेहमी पुढाकार घेत असत. कोणाचेही सुख-दुःख वाटून घेणे, अडचणीत असलेल्या कुटुंबांना आधार देणे, आणि वंचित घटकांना मदत करणे हे त्यांचे जिव्हाळ्याचे कार्य होते.

स्थानिक पातळीवर युवकांना प्रेरणा देणारे म्हणून बाबाजी शेगर यांची ओळख होती. त्यांच्या निधनाने एक संवेदनशील, लोकांसाठी जगणारा युवा सामाजिक कार्यकर्ता समाजातून हरपला आहे, अशी भावना ग्रामस्थ व्यक्त करत आहेत. त्यांच्या पश्चात आई, दोन मुली, एक मुलगा, चुलते, बहीण असा परिवार आहे. त्यांच्या अंत्ययात्रेस मोठ्या संख्येने ग्रामस्थ, नातेवाईक, मित्रपरिवार तसेच सामाजिक व राजकीय क्षेत्रातील मान्यवर उपस्थित राहून शेवटचा निरोप देतील.