अल्पवयीन मुलीचे अपहरण करून लैंगिक अत्याचार करणारा आरोपी राहुरी पोलिसांच्या जाळ्यात; चार दिवस पोलीस कोठडी

राहुरी प्रतिनिधी (सोमनाथ वाघ) : अल्पवयीन मुलीचे अपहरण करून तिच्यावर बळजबरीने लैंगिक अत्याचार करणारा आरोपी अजय विनायक बर्डे याला राहुरी पोलिसांनी वेगवान कारवाईत जेरबंद केले असून न्यायालयाने त्याला चार दिवसांची पोलीस कस्टडी सुनावली आहे. राहुरी पोलिस स्टेशन हद्दीत दिनांक 26 ऑक्टोबर 2025 रोजी अल्पवयीन मुलीचे अपहरण झाल्याची तक्रार पीडितेच्या आईने दाखल केली होती. यावरून गुरनं. 1157/2025 भारतीय दंड संहितेच्या कलम 137(2) अन्वये गुन्हा दाखल करण्यात आला होता. अल्पवयीन मुलीचा शोध घेऊन तिचा जबाब नोंदविण्यात आला असून गुन्ह्यात पोक्सो कायद्यान्वये कलमे वाढविण्यात आली. पीडित मुलीस तिच्या पालकांच्या ताब्यात देण्यात आले आहे.

आरोपीचा माग काढण्यासाठी पोलीस निरीक्षक संजय ठेंगे यांच्या नेतृत्वाखाली पोउपनि. राजू जाधव, पोहेकॉ. राहुल यादव, सुरज गायकवाड, पोकॉ. गणेश लिपणे, पोकॉ. सचिन ताजने यांच्या पथकाने गुप्त बातमीदार व तांत्रिक तपासाच्या साहाय्याने आरोपीचा शोध सुरू ठेवला. त्यानंतर आरोपी अजय विनायक बर्डे (रा. मांजरी, ता. राहुरी) याला श्रीरामपूर येथे पाठलाग करून ताब्यात घेण्यात आले.

पोलिसांनी दिनांक 21 नोव्हेंबर 2025 रोजी आरोपीस अटक करून त्याला मा. जिल्हा विशेष सत्र न्यायालय, अहिल्यानगर यांचेसमोर हजर केले असता न्यायालयाने दिनाांक 25 नोव्हेंबर 2025 पर्यंत चार दिवस पोलीस कस्टडी सुनावली. या प्रकरणी सरकारी पक्षाची बाजू शासकीय अभियोक्ता सौ. राऊत यांनी प्रभावीपणे मांडली.

गुन्ह्याचा पुढील तपास पोउपनि. राजू जाधव आणि लेखनिक पोकॉ. गणेश लिपणे यांच्याकडे दिला आहे. ऑपरेशन मुस्कान अंतर्गत राहुरी पोलिसांनी आतापर्यंत 94 मुली शोधून त्यांना पालकांच्या ताब्यात सुपूर्द केल्याची माहिती पोलिसांनी दिली.दरम्यान, मुलींनी अनोळखी व्यक्तींच्या आमिषाला बळी पडू नये, तसेच शालेय विद्यार्थिनींना कोणी त्रास देत असल्यास त्वरित पोलिसांशी संपर्क साधावा, त्यांचे नाव गोपनीय ठेवले जाईल, असे आवाहन पोलीस निरीक्षक संजय ठेंगे यांनी केले आहे.

सदर कारवाई मा. पोलीस अधीक्षक श्री सोमनाथ घार्गे, अप्पर पोलीस अधीक्षक श्री सोमनाथ वाघचौरे, उपविभागीय पोलीस अधिकारी श्री जयदत्त भवर यांच्या मार्गदर्शनाखाली करण्यात आली. या पथकात पोउपनि. राजू जाधव, पोहेकॉ. सुरज गायकवाड, पोहेकॉ. राहुल यादव, पोकॉ. गणेश लिपणे, पोकॉ. सचिन ताजने, मपोकॉ. वंदना पवार, अनिता गुरवे तसेच श्रीरामपूर सायबर सेलचे पोहेकॉ. संतोष दरेकर आणि पोहेकॉ. सचिन धनाड यांचा समावेश होता.