मानोरी येथील अयान खलील खानची महाराष्ट्र व्हॉलीबॉल संघात निवड; ग्रामस्थांच्यावतीने श्रीफळ व पुष्पगुच्छ देऊन सत्कार

राहुरी प्रतिनिधी (सोमनाथ वाघ) : श्री साईबाबा संस्थान विश्वस्त व्यवस्था, शिर्डी संचलित श्री साईबाबा ज्युनिअर अँड सीनियर कॉलेज, शिर्डी येथील विद्यार्थी आणि मानोरीचा भूमिपुत्र अयान खलील खान याची महाराष्ट्र व्हॉलीबॉल संघात निवड झाल्याने मानोरी गावात आनंद आणि अभिमानाचे वातावरण निर्माण झाले आहे. राज्यस्तरीय संघात अयानने मिळवलेल्या उल्लेखनीय यशानंतर गावात भव्य सत्कार सोहळ्याचे आयोजन करण्यात आले.

दयावान ग्रुपतर्फे आयोजित या सत्कार कार्यक्रमात मा. सरपंच हाजी अब्बासभाई शेख दयावान आणि दयावान उद्योग समूहाचे संस्थापक अध्यक्ष नसिरभाई शेख यांच्या हस्ते अयानचा शाल, श्रीफळ आणि पुष्पगुच्छ देऊन सत्कार करण्यात आला. अयानच्या क्रीडा कामगिरीचे सर्वत्र कौतुक होत असून गावाचे नाव राज्य पातळीवर उज्ज्वल केल्याबद्दल उपस्थित मान्यवरांनी त्याचे मनःपूर्वक अभिनंदन केले.

या कार्यक्रमास शामतभाई शेख, दुलेखाँभाई पठाण, राजुभाई पठाण, आमजद खान, रफिक पठाण, तैय्यब पठाण, इसाक पठाण, तोफीक बिल्डर, कडुभाई पठाण, शौकत पठाण, हारुण पठाण, शकिल पठाण, याकुब शेख, रमजान शेख, प्रशांत आढाव, विशाल जगधने, सलमान पठाण, मोबीन पठाण, पापा पठाण, सौरभ इनामदार यांसह अनेक मान्यवर, ग्रामस्थ तसेच दयावान ग्रुपचे सदस्य मोठ्या संख्येने उपस्थित होते.

वक्त्यांनी आपल्या भाषणात सांगितले की, अयानने कठोर परिश्रम, निष्ठा आणि जिद्दीच्या जोरावर हे यश संपादन केले असून त्याची खेळातील प्रगती प्रेरणादायी आहे. आगामी काळातही उत्कृष्ट कामगिरी करून राष्ट्रीय पातळीवर मानोरी गावाचा झेंडा फडकवावा, अशा शुभेच्छा मान्यवरांनी व्यक्त केल्या. शेवटी ग्रामस्थ आणि दयावान ग्रुपतर्फे अयान खलील खान याला पुढील वाटचालीसाठी हार्दिक शुभेच्छा देण्यात आल्या.