पुण्यश्लोक अहिल्यादेवी होळकर सामाजिक प्रतिष्ठानच्या अभ्यासिकेतील दोन विद्यार्थ्यांची थेट इंडियन आर्मीमध्ये निवड,  घरच्या प्रतिकूल परिस्थितीवर मात करत रोहित तमनर व सतीश दाभाडे यांची इंडियन आर्मीमध्ये भरारी

राहुरी (सोमनाथ वाघ)  : पुण्यश्लोक अहिल्यादेवी होळकर सामाजिक प्रतिष्ठान, राहुरी यांच्या अभ्यासिकेतून घडलेले दोन गुणवंत तरुण थेट इंडियन आर्मीमध्ये निवड होऊन देशसेवेसाठी सज्ज झाले आहेत. चि. रोहित बाळासाहेब तमनर व चि. सतीश दाभाडे या दोन्ही विद्यार्थ्यांच्या यशाने प्रतिष्ठान व राहुरी तालुक्याचे नाव अभिमानाने उज्ज्वल केले आहे.

रोहित बाळासाहेब तमनर (वय 19) हा बाळासाहेब जगन्नाथ तमनर यांचा मुलगा. आर्थिक परिस्थिती प्रतिकूल असतानाही वडिलांनी राहुरी मार्केट कमिटीमध्ये हमाली करून दोन्ही मुलांचे शिक्षण समर्थपणे चालू ठेवले. घरच्या संकटांना न जुमानता रोहितने अथक परिश्रम घेत आर्मी भरतीची तयारी केली आणि अखेर जिद्दीच्या बळावर भारतीय सैन्यात निवड होण्याचा मान पटकावला. त्याचा भाऊसुद्धा पोलिस भरतीसाठी तयारी करत आहे. रोहित हा पुण्यश्लोक अहिल्यादेवी होळकर सामाजिक प्रतिष्ठानच्या ‘पुण्यश्लोक अभ्यासिका’ मध्ये अध्ययन करत होता.

या दोन्ही विद्यार्थ्यांचा विजय उत्साहात साजरा करण्यासाठी प्रतिष्ठानच्या वतीने आज गौरव सोहळा आयोजित करण्यात आला. अध्यक्ष विजयराव uतमनर, माजी सरपंच ज्ञानेश्वर बाचकर, अनिल डोलनर, योगशिक्षिका सौ. योजना ताई लोखंडे यांच्यासह मान्यवर व विद्यार्थी मोठ्या संख्येने उपस्थित होते. मान्यवरांनी विद्यार्थ्यांच्या यशाचे कौतुक करत पुढील सेवेंतही उत्तुंग भरारी घ्यावी अशा शुभेच्छा दिल्या.

प्रसंगी अध्यक्ष विजुभाऊ तमनर म्हणाले,“आधुनिक, दर्जेदार आणि कष्टाळू विद्यार्थ्यांना संधी देणारी अभ्यासिका उभी करण्याचे आमचे स्वप्न आज या यशामुळे सार्थ ठरले आहे. प्रतिष्ठानच्या अभ्यासिकेतून विद्यार्थी संरक्षण क्षेत्रात निवड होणे ही आमच्यासाठी मोठी पर्वणी आहे. ”अभ्यासिकेत सुरू झालेल्या शैक्षणिक उपक्रमांना आज मिळालेले हे यश प्रेरणादायी ठरले असून पुढील काळात अधिकाधिक विद्यार्थ्यांना उच्च ध्येय गाठण्यासाठी मदत करण्याचा निर्धार प्रतिष्ठानने व्यक्त केला आहे.