मानोरी परिसरातील धुमाळ वस्ती–गणपतवाडी खडीकरण रस्त्याच्या कामाचा शुभारंभ ; शेतकरी व विद्यार्थ्यांना मोठा दिलासा

राहुरी (सोमनाथ वाघ)  : मानोरी परिसरातील धुमाळ वस्ती ते गणपतवाडी दरम्यानचा खडीकरण रस्ता अनेक वर्षांपासून अत्यंत जीर्णावस्थेत होता. उखडलेल्या रस्त्यामुळे झालेली खोल खड्ड्यांची मालिका, पावसाळ्यात निर्माण होणारा चिखल आणि उन्हाळ्यातील धुळीमुळे शेतकरी, विद्यार्थी तसेच ग्रामस्थांचे दैनंदिन जीवन विस्कळीत झाले होते. अखेर सार्वजनिक बांधकाम विभागाकडून मिळालेल्या निधीतून या रस्त्याच्या खडीकरण कामाचा शुभारंभ होताच ग्रामस्थांनी समाधानाची भावना व्यक्त केली. दररोज शेतीसाठी ये–जा करण्यासाठी योग्य रस्ता नसल्याने शेतकऱ्यांचे कामकाज अडथळ्यात येत होते. तसेच शाळा–कॉलेजला जाताना विद्यार्थ्यांना मोठ्या त्रासाला सामोरे जावे लागत होते. त्यामुळे या कामाला मिळालेला मुहूर्त हा गावाच्या विकासातील महत्त्वाचा टप्पा ठरला आहे.

या शुभारंभ कार्यक्रमाला सरपंच सौ. ताराबाई भिमराज वाघ, ग्रामविकास अधिकारी संतोष राठोड, सदस्य शामराव आढाव, माध्यमिक शिक्षण बँकेचे माजी चेअरमन उत्तमराव खुळे, युवा नेते पोपटराव पोटे, युवा नेते बापूसाहेब वाघ, माजी उपसरपंच अण्णासाहेब तोडमल, सोसायटी संचालक भास्कर भिंगारे, तंटामुक्ती अध्यक्ष अण्णासाहेब ठुबे, मेजर चाँदभाई पठाण, संपत थोरात, भाऊसाहेब कारले, रावसाहेब चुळभरे, दादासाहेब चोथे, सोमनाथ थोरात, नारायण चुळभरे, भाऊराव चोथे, संजय डोंगरे, राहुल वाघचौरे यांच्यासह मोठ्या संख्येने ग्रामस्थ उपस्थित होते.

यावेळी ग्रामस्थांनी सांगितले की, “खडीकरण झालेल्या रस्त्यामुळे वाहतूक अधिक सुरक्षित व सुकर होणार असून विद्यार्थ्यांना होणारा प्रवासाचा त्रास लक्षणीयरीत्या कमी होईल. शेतकरी वर्गालाही मोठा दिलासा मिळेल.” तसेच या कामासाठी सातत्याने पाठपुरावा करणाऱ्या ग्रामपंचायतीच्या पदाधिकाऱ्यांचेही ग्रामस्थांनी विशेष कौतुक केले.धुमाळ वस्ती ते गणपतवाडी खडीकरण रस्त्यामुळे परिसरातील मूलभूत सुविधांचा दर्जा उंचावेल, तसेच दळण–वळण सक्षम होऊन गाव विकासाचा वेग अधिक वाढेल, असा विश्वास ग्रामस्थांनी व्यक्त केला.