संगमनेर प्रतिनिधी (गंगासागर पोकळे) : अवैध वाळू उत्खनन व वाहतूक करणाऱ्या वाळू माफियांवर अंकुश ठेवण्यासाठी अहिल्यानगर पोलिसांनी सुरू केलेल्या विशेष मोहिमेत स्थानिक गुन्हे शाखेला मोठे यश मिळाले आहे. मांडवे ता. संगमनेर परिसरात करण्यात आलेल्या कारवाईत तब्बल 5,06,400/- रुपयांचा मुद्देमाल पोलिसांनी जप्त केला आहे.मा. पोलीस अधीक्षक श्री सोमनाथ घार्गे यांनी जिल्ह्यातील अवैध गौणखनिज उत्खननावर कठोर कारवाई करण्याचे आदेश दिल्यानंतर स्थानिक गुन्हे शाखेचे पोलीस निरीक्षक श्री किरणकुमार कबाडी यांच्या मार्गदर्शनाखाली विशेष पथकाची नियुक्ती करण्यात आली. पोलीस अंमलदार संतोष खैरे, गणेश लोंढे, बाळासाहेब गुंजाळ व अमृत आढाव यांचा समावेश असलेल्या पथकास गुप्त माहिती घेवून ठोस कारवाईचे निर्देश देण्यात आले होते.
दिनांक 25 नोव्हेंबर 2025 रोजी गुप्त माहितीच्या आधारे तपास करत असताना घारगांव पोलीस ठाणे हद्दीतील शिंदोडी ते मांडवे रस्ता व तरंगेवस्ती मार्ग येथे संशयास्पद अवस्थेत अशोक लेलॉड कंपनीचा बडा दोस्त टेम्पो आढळला. पाहणी केली असता टेम्पोमध्ये वाळू भरलेली असल्याचे दिसून आले. तत्काळ तपास केल्यावर टेम्पोतील दोन्ही इसमांना ताब्यात घेण्यात आले.
ताब्यात घेतलेल्या आरोपींची नावे पुढीलप्रमाणे – 1) राहुल किशोर खेमनर (वय 21, रा. मांडवे बु., ता. संगमनेर, जि. अहिल्यानगर) 2) रविंद्र संजय मोरे (वय 23, रा. मांडवे बु., ता. संगमनेर, जि. अहिल्यानगर) दोघांनीही चालक व मालाचे मालक आम्हीच असल्याची कबुली दिली. आरोपींच्या ताब्यातून पुढील एकूण 5,06,400/- रुपये किमतीचा मुद्देमाल जप्त करण्यात आला – 6,000/- रुपये किमतीची 1 ब्रास वाळू – 5,00,000/- रुपये किमतीचा बडा दोस्त टेम्पो, 400/- रुपये किमतीची दोन लोखंडी फावडी या प्रकरणी पोलीस नाईक अमृत शिवाजी आढाव यांच्या फिर्यादीवरून घारगाव पोलीस ठाणे गु.र.नं. 355/2025 भारतीय न्याय संहिता 2023 चे कलम 303(2) अन्वये गुन्हा दाखल करण्यात आला आहे.
संपूर्ण कारवाई मा. श्री सोमनाथ घार्गे, पोलीस अधीक्षक यांच्या सूचनेनुसार आणि मार्गदर्शनाखाली स्थानिक गुन्हे शाखेच्या पथकाने यशस्वीरीत्या पार पाडली.
Leave a reply
