अनिकेत वडीतके आत्महत्येला जबाबदार आरोपींना अटक न झाल्यास ८ डिसेंबरपासून आमरण उपोषण,  आरोपींना अटक व योग्य कारवाई झाल्याशिवाय उपोषण मागे घेतले जाणार नाही विजय तमनर यांचा इशारा

श्रीरामपूर प्रतिनिधी (रंगनाथ तमनर) : गळनिंब, तालुका श्रीरामपूर येथील अल्पवयीन तरुण कै. अनिकेत सोमनाथ वडितके यांच्या आत्महत्येस जबाबदार आरोपींना अद्याप अटक न झाल्याने संतप्त कुटुंबियांनी ८ डिसेंबर २०२५ पासून पोलीस अधीक्षक कार्यालयासमोर संपूर्ण कुटुंबासह आमरण उपोषण करण्याचा इशारा पोलीस अधीक्षक सोमनाथ घार्गे यांना दिला आहे. याबाबत यशवंत सेनेचे जिल्हाप्रमुख विजय तमनर यांच्या नेतृत्वाखाली निवेदन देण्यात आले.

निवेदनानुसार, २७ ऑक्टोबर २०२५ रोजी तथाकथित गोरक्षकांनी अनिकेत वडीतके याला अडवून मारहाण केली व त्याच्याकडून खंडणीची मागणी केली. त्यानंतर त्याच्यावर खोटा गुन्हा दाखल करून सोशल मीडियावर बदनामी करण्यात आली. या मानसिक त्रासातून दि. २८ ऑक्टोबर २०२५ रोजी अनिकेतने राहत्या घरी आत्महत्या केली.

कुटुंबीयांचे आरोप आहेत की, लोणी पोलीस स्टेशनचे पोलीस निरीक्षक कैलास वाघ यांनी गुन्हा दाखल करण्यास १९ तासांपेक्षा जास्त विलंब केला. याच्या निषेधार्थ ३१ ऑक्टोबर रोजी कोल्हार चौक येथे रस्तारोको आंदोलनही करण्यात आले. मात्र तरीही घटनेतील एकही आरोपी अटक न झाल्याचे कुटुंबीयांनी सांगितले. आरोपी सर्रास कोल्हार परिसरात फिरत असून पोलीस प्रशासन जाणूनबुजून दुर्लक्ष करत असल्याचा आरोप अधीक्षक सोमनाथ घार्गे यांना दिलेल्या निवेदनात म्हंटले आहे.

या निषेधार्थ विजय तमनर, मयत अनिकेतचे आई–वडील सोमनाथ वडितके व विद्या वडितके तसेच संपूर्ण कुटुंब ८ डिसेंबरपासून आमरण उपोषणास बसणार असल्याचे निवेदनात स्पष्ट करण्यात आले. आरोपींना तात्काळ अटक करून गुन्ह्याचा सखोल तपास करण्यात यावा व आरोपींना कठोर शिक्षा मिळेल याची जबाबदारी पोलीस अधीक्षकांनी स्वीकारावी, अशी मागणी करण्यात आली आहे.

तसेच, या प्रकरणात लोणी पोलीस स्टेशनचे पोलीस निरीक्षक कैलास वाघ व संबंधित कर्मचाऱ्यांनी अत्यंत हलगर्जीपणे वागल्याचा आरोप करीत त्यांच्यावर निलंबनाची कारवाई करून सह–आरोपी करण्याची मागणीदेखील करण्यात आली.

निवेदन देताना विजय तमनर (यशवंत सेना जिल्हाप्रमुख), यशवंत सेनेचे नगर शहराध्यक्ष कांतीलाल लाडकर, मयत अनिकेतचे वडील सोमनाथ वडितके, आई विद्या वडितके, सामाजिक कार्यकर्ते दादाभाऊ तमनर, पोपटराव महानोर आदी उपस्थित होते.