गुगल मॅपवर लोकेशन शोधून कॉपर चोरी करणारी अंतरराज्यीय टोळी जेरबंद – स्थानिक गुन्हे शाखेकडून मोठी कारवाई

अहिल्यानगर प्रतिनिधी ( वसंत रांधवण) : जिल्ह्यात एमएसईबी सब स्टेशनमधून वाढत्या कॉपर चोरीच्या घटनांना अखेर आळा बसला असून स्थानिक गुन्हे शाखेने अत्यंत कौशल्यपूर्ण तपास करून गुगल मॅपच्या लोकेशनच्या आधारे सब स्टेशन फोडणारी आंतरराज्यीय टोळी जेरबंद केली आहे. या कारवाईत पोलिसांनी ४,४०,००० रुपये किमतीचा मुद्देमाल जप्त केला असून तीन जिल्ह्यांतील कॉपर चोरीचे गुन्हे उघडकीस आले आहेत.

दिनांक ४ नोव्हेंबर २०२५ रोजी १३२ केव्ही उपकेंद्र, खांडके, पिंपळगाव लांडगा, ता. जि. अहिल्यानगर येथील सब स्टेशनमधून कॉपर पाईप व बेल्ड अज्ञात चोरट्यांनी चोरून नेले होते. याप्रकरणी अरविंद एकनाथ बडे (रा. सावेडी) यांच्या फिर्यादीवरून नगर तालुका पोलीस ठाण्यात गु.र.नं. 998/2025, कलम 303(2) बी.एन.एस. 2023 प्रमाणे गुन्हा दाखल करण्यात आला होता.

प्राप्त फिर्यादीवरुन अहिल्यानगर जिल्ह्यामध्ये कॉपर चोरीच्या वारंवार घटना होत असल्याने श्री सोमनाथ घार्गे साहेब, पोलीस अधीक्षक अहिल्यानगर यांनी स्थानिक गुन्हे शाखेस कॉपर चोरी करणारे आरोपींची माहिती काढुन गुन्हे उघडकीस आणणेबाबत सुचना दिलेल्या आहेत. 

 त्यानुसार स्थानिक गुन्हे शाखेचे पोनि श्री किरणकुमार कबाडी यांचे मार्गदर्शनाखाली पोलीस उपनिरीक्षक समीर अभंग, पोलीस अंमलदार राहुल द्वारके, लक्ष्मण खोकले, विष्णु भागवत, फुरकान शेख, भिमराज खर्से, राहुल डोके, अमोल आजबे, जालिंदर माने, योगेश कर्डीले, प्रशांत राठोड, प्रमोद जाधव, महादेव भांड यांचे पथक तयार करुन सदर पथकास कॉपर चोरी करणारे आरोपींची माहिती काढुन गुन्हे उघडकीस आणणेबाबत सुचना व मार्गदर्शन करुन पथकास रवाना केले. 

 पथकाने अहिल्यानगर जिल्ह्यातील कॉपर चोरीचे घटनांठिकाणी भेट देवुन घटना ठिकाणची माहिती संकलित केली तसेच अशाप्रकारे गुन्हे करणारे रेकॉर्डवरील आरोपींची माहिती घेण्यात आली. कॉपर चोरीच्या घटनाठिकाणचे प्राप्त माहितीवरुन व्यवसायिक कौशल्याचे आधारे सलग 8 दिवस तपास करुन दिनांक 24/11/2025 रोजी मिळालेल्या माहितीनुसार आरोपी नामे 1) बबलु उर्फ हुसेन रेहमत खान वय 38 वर्षे, रा. कडमेडी, ता. समशाबाद, जि. विदीशा, मध्यप्रदेश, 2) समीम कमरअली खान वय 32 वर्षे, रा. कडमेडी, ता. समशाबाद, जि. विदीशा, मध्यप्रदेश, 3) शकील लईस खान वय 32 रा. ग्रामभरोसा, ता. बेरसिया, जि. भोपाळ, मध्यप्रदेश, 4) कासीम इदरीस खान वय 30 वर्षे, रा. महाराज खेडी, ता. सिरोज, जि. विदीशा, मध्यप्रदेश, 5) शाहरुख साबीर खान वय 23 वर्षे, रा. जिनीया, ता. भोपाळ, जि. भोपाळ, मध्यप्रदेश यांना ताब्यात घेवुन त्यांचेकडे सखोल व बारकाईने तपास करता त्यांनी गुगल मॅपवर एम.एस.ई.बी. सब स्टेशन कोठे आहे याबाबत माहिती घेवुन त्यानंतर सदर सब स्टेशन परिसरामध्ये दोन दिवस पाहणी करुन येण्या जाण्याचे रस्त्याची माहिती घेवुन रात्री व पहाटेच्या दरम्यान चोरी करत असल्याचे सांगितले आहे. तसेच सदर चोरीचा मुद्देमाल घेवुन फरार होत व फक्त कॉपर चोरीच्या उद्देशाने ते महाराष्ट्रामध्ये येत असल्याचे निष्पन्न झाले आहे. ताब्यातील आरोपींनी खांडके, ता. जि. अहिल्यानगर येथील सब स्टेशन, 220 केव्ही कौडगांव, ता. जि. अहिल्यानगर येथील विंड वर्ल्ड लि. कं., शेवगांव, नेवासा, सिन्नर, पारगांव या ठिकाणी असलेले एम.एस.ई.बी. सब स्टेशनमधुन गुगल मॅपचे लोकेशनचे आधारे कॉपर चोरी केल्याचे सांगितले. 

 मिळुन आलेल्या इसमांचे ताब्यातुन 1,40,000/- रुपये किमतीचे कॉपर पोल, व 3,00,000/- रुपये किमतीची गुन्ह्यामध्ये वापरलेली मारुती सुझुकी कंपनीची स्विफ्ट डिझायर कार क्रमांक एम.एच. 13 टी. ए. 4320 असा एकुण 4,40,000/- रुपये किमतीचा मुद्देमाल जप्त करण्यात आला आहे. 

 ताब्यातील इसमांकडे त्यांनी अशाप्रकारे आणखी गुन्हे केले आहेत काय याबाबत सखोल व बारकाईने विचारपुस करता त्यांचेकडुन अहिल्यानगर, नाशिक ग्रामीण व पुणे ग्रामीण जिल्ह्यातील खालील गुन्हेउघडकीस आले आहेत.  

अ.नं. पोलीस ठाणे गु.र.नं. व कलम

1 नगर तालुका, जि. अहिल्यानगर 998/2025 बी.एन.एस. 2023 चे क. 303(2),

2 शेवगांव, जि. अहिल्यानगर 933/2025 बी.एन.एस. 2023 चे क. 303(2)

3 नेवासा, जि. अहिल्यानगर 175/2025 बी.एन.एस. 2023 चे क. 303(2), 4 नगर तालुका, जि. अहिल्यानगर 1056/2025 बी.एन.एस. 2023 चे क. 303(2) 

5 सिन्नर, जि. नाशिक ग्रामीण 492/2025 बी.एन.एस. 2023 चे क. 303(2),

6 पारगांव, जि. पुणे ग्रामीण 86/2025 बी.एन.एस. 2023 चे क. 303(2) ताब्यातील आरोपींना नगर तालुका पोलीस ठाणे गु.र.नं. 998/2025 बी.एन.एस. 2023 चे क. 303(2) प्रमाणे गुन्ह्याचे तपासकामी नगर तालुका पोलीस स्टेशन येथे हजर करण्यात आले असुन पुढील तपास नगर तालुका पोलीस स्टेशन करीत आहे.  

 सदरची कारवाई मा. श्री. सोमनाथ घार्गे पोलीस अधीक्षक, अहिल्यानगर यांचे सुचना व मार्गदर्शनाखाली स्थानिक गुन्हे शाखेचे वरील पोलीस अधिकारी व अंमलदार यांनी केलेली आहे.