नैराश्यातुन घर सोडून गेलेल्या अल्पवयीन बेपत्ता मुलीचा राहुरी पोलिसांकडुन केवळ दोन तासांत शोध, ऑपरेशन मुस्कान अंतर्गत मागील २२ महिन्यात शोधलेल्या अल्पवयीन मुलींची संख्या ९६ वर

राहुरी प्रतिनिधी (सोमनाथ वाघ) : राहुरी बु. ता.राहुरी येथील १७ वर्षीय अल्पवयीन मुलगी दिनांक २५ नोव्हेंबर २०२५ रोजी सायं. ४:३० वाजता अज्ञात कारणावरून घरातून निघून गेली. मुलगी बेपत्ता असल्याची तक्रार त्याच दिवशी रात्री ८:०० वाजता राहुरी पोलिस ठाण्यात दाखल करण्यात आली. भारतीय न्याय संहिता कलम १३७(२) नुसार गुन्हा नोंदवून राहुरी पोलिसांनी तत्काळ तपासाला सुरुवात केली.

तपासादरम्यान गोपनीय बातमीदाराकडून मिळालेल्या माहितीच्या आधारे पोलीस पथकाने राहुरी रेल्वे स्टेशन परिसरातील आर्डगाव रेल्वे चौकीजवळ शोध मोहीम राबवली. रात्री सुमारे १० वाजता पोलिसांना व स्थानिक नागरिकांना रेल्वे रुळाजवळ नैराश्यग्रस्त अवस्थेत सदर अल्पवयीन मुलगी आढळली. तत्काळ तिचा ताबा घेऊन सुरक्षितपणे पोलिस स्टेशनमध्ये आणण्यात आले. केवळ दोन तासांत मुलीचा शोध लावून तिला तिच्या पालकांच्या स्वाधीन करण्यात पोलिसांना यश आले. या कारवाईनंतर ऑपरेशन मुस्कान अंतर्गत राहुरी पोलिसांनी शोध लावलेल्या अल्पवयीन मुलींची संख्या मागील २२ महिन्यांत ९६ वर पोहोचली आहे, ही अत्यंत प्रशंसनीय बाब असल्याचे स्थानिक नागरिकांनी नमूद केले.

सदर शोधमोहीम व कारवाई मा. सोमनाथ घार्गे (पोलीस अधीक्षक, अहिल्यानगर), मा. सोमनाथ वाघचौरे (अपर पोलीस अधीक्षक, श्रीरामपूर) व मा. जयदत्त भवर (उपविभागीय पोलीस अधिकारी, श्रीरामपूर विभाग) यांच्या मार्गदर्शनाखाली पार पडली.या ऑपरेशनमध्ये पोलीस निरीक्षक श्री संजय आर. ठेंगे यांच्या नेतृत्वाखाली सहाय्यक फौजदार तुळशीराम गीते, पोहेकॉ संभाजी बडे, पोहेकॉ संदीप ठाणगे, पोकॉ अंकुश भोसले, महिला पोकॉ वंदना पवार, पोकॉ संतोष शिंदे व चालक पोलीस शिपाई जालिंदर साखरे यांनी विशेष मेहनत घेतली. सदर गुन्ह्याचा तपास हेड कॉन्स्टेबल संभाजी बडे करीत आहेत.

राहुरी पोलीस स्टेशनच्या वतीने राहुरी तालुक्यातील सर्व नागरिकांना आवाहन करण्यात येते की आपल्या अल्पवयीन मुला-मुलींची आपण खुलेपणाने संवाद ठेवून अशा प्रकारे त्यांच्या मनात कुठलाही ताण तणाव किंवा आकर्षण निर्माण होऊन त्यांच्यावर अपहरणाचा प्रसंग येऊ नये यासाठी आपल्या पाल्यांसोबत मित्रत्वाने मोकळेपणाने वागून संवाद ठेवावा .तसेच अल्पवयीन पाल्यांच्या मित्र-मैत्रिणींच्या व ते वापरत असलेल्या मोबाईल ॲपवर लक्ष ठेवावे .सदर गुन्ह्याबाबत तसेच इतर काही माहीती दयावयाची असल्यास श्री. पोनि, संजय ठेंगे राहुरी पोलीस स्टेशन संपर्क – 8483038953 वर माहिती द्यावी.