राहुरी पोलिस स्टेशन पथकाचा शोधमोहीमेला यश – 20 दिवसांनंतर अल्पवयीन मुलगी सुरक्षित पालकांच्या ताब्यात

राहूरी प्रतिनिधी ( सोमनाथ वाघ) : राहुरी तालुक्यातील 14 वर्षीय अल्पवयीन मुलीचा 20 दिवसांपासून बेपत्ता असलेला शोध अखेर राहुरी पोलिस स्टेशन पथकाने लावला असून मुलीला सुरक्षित स्थितीत ताब्यात घेऊन तिच्या आई-वडिलांच्या स्वाधीन करण्यात आले आहे. लग्नाचा उद्देश ठेवून अज्ञात इसमाने मुलीला पळवून नेल्याची प्राथमिक माहिती तपासात समोर आली असून आरोपीला पोलिसांनी अटक केली आहे.

दि. 26 ऑक्टोबर 2025 रोजी पहाटे 5.00 वाजता फिर्यादी यांच्या मुलीने रागाच्या भरात कोणालाही न सांगता घरातून बाहेर पडून परत न आल्याने बेपत्ता झाल्याची तक्रार राहुरी पोलिस स्टेशनमध्ये दाखल करण्यात आली होती. याबाबत भारतीय न्याय संहिता कलम 137 (2) नुसार गुन्हा दाखल करण्यात आला होता. पुढील तपासात हा ‘अपहरणाचा’ प्रकार असल्याचे निदर्शनास आल्यानंतर मुलीचा जबाब नोंदवून बालकांचे लैंगिक अपराधांपासून संरक्षण अधिनियम (पोस्को) अंतर्गत कलमांची वाढ करण्यात आली.

महत्त्वपूर्ण तांत्रिक तपास, गुप्त माहिती आणि सातत्यपूर्ण शोध मोहिमेमुळे पोलिसांनी अखेर मुलीचा शोध लावला. आरोपीचा शोध घेऊन त्याला अटक करण्यात आली असून पुढील तपास सुरू आहे. मुलगी पूर्णपणे सुरक्षित असून तिला वैद्यकीय तपासणीनंतर पालकांच्या ताब्यात देण्यात आले आहे.

सदरची कारवाई पोलीस अधीक्षक मा. सोमनाथ घार्गे (अहिल्यानगर), अपर पोलीस अधीक्षक मा. सोमनाथ वाघचौरे (श्रीरामपूर), उपविभागीय पोलीस अधिकारी मा. जयदत्त भवर (श्रीरामपूर विभाग) यांच्या मार्गदर्शनाखाली करण्यात आली.

कारवाईत पोलिस निरीक्षक श्री संजय आर. ठेंगे (राहुरी पोलीस स्टेशन), पोसई राजू जाधव, पोहेकॉ राहुल यादव, पोकॉ गणेश लिपने, पोकॉ सचिन ताजने, मपोकॉ अनिता गुरवे व मपोकॉ वंदना पवार यांनी मोलाचे योगदान दिले.या गुन्ह्याचा तपास पोसई राजू जाधव व पोकॉ गणेश लिपने करत आहेत.

घटनेबाबत किंवा संबंधित कोणतीही माहिती असल्यास नागरिकांनी पोलीस निरीक्षक श्री संजय ठेंगे (राहुरी पोलीस स्टेशन) – संपर्क 8788891147 या क्रमांकावर कळवण्याचे आवाहन पोलीस प्रशासनाने केले आहे.