प्राथमिक शिक्षक बँकेत गोरक्षनाथ विटनोर यांची अध्यक्षपदी, ज्ञानेश्वर शिरसाठ उपाध्यक्षपदी बिनविरोध निवड, इतिहासात पहिलीच बिनविरोध निवड — प्राथमिक शिक्षक बँकेवर गुरुमाऊली मंडळाचा पुन्हा दबदबा

राहुरी प्रतिनिधी (ज्ञानेश्वर सुरशे) : अहिल्यानगर जिल्हा प्राथमिक शिक्षक बँकेच्या निवडणुकीत यंदा ऐतिहासिक घडामोडी घडल्या आहेत. या निवडणुकीत प्रथमच अध्यक्ष आणि उपाध्यक्ष पदासाठी बिनविरोध निवड झाली असून, गुरुमाऊली मंडळाने पुन्हा एकदा आपले वर्चस्व कायम ठेवत मोठा विजय मिळवला आहे. अध्यक्षपदी गोरक्षनाथ विटनोर तर उपाध्यक्षपदी ज्ञानेश्वर शिरसाठ यांची निवड करण्यात आली. संपूर्ण निवडणूक प्रक्रिया अत्यंत शांततेत, सुसंवादाच्या आणि ऐक्याच्या वातावरणात पार पडल्याने शिक्षक समाजात समाधानाचे वातावरण निर्माण झाले आहे.

या निवडणुकीत विरोधकांनी सत्तांतरासाठी प्रयत्नांची शर्थ केली, मात्र आवश्यक संख्याबळ नसल्याने अखेर त्यांना माघार घ्यावी लागली. त्यामुळे गुरुमाऊली मंडळाचा विजय निश्‍चित झाला आणि बँकेच्या इतिहासात प्रथमच दोन्ही सर्वोच्च पदांवर बिनविरोध निवड झाली. बँकेच्या बैठकीला सर्व संचालक उपस्थित होते. विशेष म्हणजे, विरोधी गटातील काही संचालकदेखील या बैठकीत सहभागी झाल्याने “विरोधकही गुरुमाऊलीच्या नेतृत्वाखाली परत आले काय?” अशी चर्चेची जोरदार लाट जिल्हाभर उमटली आहे.

निवडीनंतर अध्यक्ष गोरक्षनाथ विटनोर यांनी आपल्या प्रतिक्रिया देताना सांगितले की, “शिक्षक समाजाच्या आर्थिक उन्नतीसाठी बँकेचा कारभार पारदर्शक ठेवत सर्व संचालक, कर्मचारी आणि सभासदांच्या सहकार्याने बँकेचा विकास साधू. शिक्षकांचा विश्वास आणि बँकेवरील प्रेम आमची सर्वात मोठी ताकद आहे.”

तर उपाध्यक्ष ज्ञानेश्वर शिरसाठ यांनी व्यक्त केले की,“गुरुमाऊली मंडळाच्या एकजुटीमुळे ही बिनविरोध निवड शक्य झाली आहे. बँकेच्या प्रगतीसाठी नव्या कल्पना आणि डिजिटल उपक्रम राबवून शिक्षक वर्गाचा आर्थिक आत्मविश्वास वाढविण्याचा आमचा प्रयत्न असेल.”

बँकेच्या या ऐतिहासिक बिनविरोध निवडीमुळे संपूर्ण शिक्षक समाजात आनंदाचे वातावरण पसरले आहे. अनेक सभासदांनी या घटनेचे स्वागत करत नवीन नेतृत्वाकडून पारदर्शकता, नवोन्मेष आणि सभासदहित जोपासणाऱ्या कारभाराची अपेक्षा व्यक्त केली आहे.

गुरुमाऊली मंडळाने आपल्या संघटनेतील ऐक्य, सहकार्य आणि सकारात्मक दृष्टिकोनाच्या जोरावर ही निवड बिनविरोध करण्याचा आदर्श निर्माण केला आहे. त्यामुळे अहिल्यानगर जिल्हा प्राथमिक शिक्षक बँक आता नव्या ऊर्जेने आणि नव्या विश्वासाने पुढील वाटचाल करणार असल्याची खात्री शिक्षक वर्गात व्यक्त केली जात आहे.