इंदापूर तालुका प्रतिनिधी / प्रविण वाघमोडे : २७ सप्टेंबर रोजी ब्राईट फ्युचर इंग्लिश मीडियम स्कूल अँड ज्युनिअर कॉलेज खडकी येथे दोन ऑक्टोबर रोजी होणाऱ्या गांधी जयंती निमित्त ब्राईट स्वच्छता अभियान 3.0 व वृक्षारोपण या विशेष उपक्रमाचे आयोजन करण्यात आले होते. या उपक्रमाचा उद्देश स्वच्छता, पर्यावरण संवर्धन व सामाजिक बांधिलकीची जाणीव निर्माण करणे हा होता.
या उपक्रमाची सुरुवात शाळा परिसरातील वृक्षारोपण व स्वच्छता मोहिमेने झाली. यावेळी संस्थेचे अध्यक्ष राजू गायकवाड, सचिव ऋषिकेश गायकवाड, उपाध्यक्ष तेजस गायकवाड, खजिनदार तुषार काळे, संचालिका विद्या काळे, मुख्याध्यापिका शितल काळभोर, उपमुख्याध्यापक योगेश हगारे उपस्थित होते. या सर्व मान्यवरांच्या हस्ते शाळेतील परिसरात वृक्षारोपण करण्यात आले. सकाळी सातवी, दहावी ,अकरावी व बारावीतील विद्यार्थ्यांनी मान्यवरांच्या उपस्थितीत खडकी ग्रामपंचायत कार्यालय परिसरात स्वच्छता अभियानाची सुरुवात केली. सर्वांनी हातात झाडू, फावडे घेऊन परिसरातील प्लास्टिक, पालापाचोळा, गवत, कचरा इत्यादी स्वच्छ केला. ‘स्वच्छ गाव- सुंदर गाव’ ‘गांधीजींचा विचार – स्वच्छतेचा प्रचार’ अशा घोषणा देत विद्यार्थ्यांनी जनजागृती केली.
स्वच्छता मोहिमेनंतर ग्रामपंचायत कार्यालयासमोर दौंड तालुका राष्ट्रवादी काँग्रेस पक्ष शरदचंद्र पवार पार्टीचे युवक अध्यक्ष सचिन काळभोर,खडकी गावच्या विद्यमान सरपंच ज्योती सुमित शिंदे,माजी सरपंच अनिल गुणवरे,आधार सेवा फाऊंडेशन अध्यक्ष सचिन शिंदे,प्रगतशील बांधकाम व्यावसायिक सुमित शिंदे आणि सहकारी उपस्थित होते यांच्या हस्ते वृक्षारोपण करण्यात आले.
यावेळी खडकी गावचे ग्रामस्थ ही उपस्थित होते. त्यानंतर सर्व मान्यवर शिक्षक व विद्यार्थी महादेव मंदिर परिसरात गेले . तेथील सर्व परिसर स्वच्छ करून मंदिर परिसरतही वृक्षारोपण करून धार्मिक स्थळांच्या ठिकाणी ही स्वच्छतेची जाणीव निर्माण केली. या सर्व कार्यक्रमाचे आयोजन विज्ञान शिक्षक श्री.प्रशांत चव्हाण यांनी केले होते तसेच क्रिडा शिक्षक श्री.मारुती पोळेकर यांचे ही सहकार्य मोलाचे होते.
Leave a reply













