SR 24 NEWS

सामाजिक

राहुरीत नाथ प्रतिष्ठानतर्फे भव्य रास दांडिया महोत्सवाला उत्साही सुरुवात – सर्व महिला व मुलींसाठी खुला प्रवेश, सामाजिक समतेचा आदर्श उपक्रम

Spread the love

राहुरी प्रतिनिधी (सोमनाथ वाघ) : राहुरी शहरातील अग्रगण्य सामाजिक संस्था नाथ प्रतिष्ठान यांच्या वतीने भव्य रास दांडिया महोत्सव शुक्रवार, दि. २६ सप्टेंबर रोजी जल्लोषात सुरू झाला असून, हा महोत्सव ३० सप्टेंबरपर्यंत दररोज रंगतदार कार्यक्रमांनी सजणार आहे. या महोत्सवात मुलींसाठी सायंकाळी ७ ते ८.३० आणि महिलांसाठी रात्री ८.३० ते ११ या वेळेत गरबा-दांडियाचा उत्सव साजरा करण्यात येतो.

नाथ प्रतिष्ठानचे संस्थापक व युवा नेते सौरभ उंडे यांनी शहरातील महिलांना आणि तरुणींना आवाहन केले की “हा दांडिया महोत्सव कोणत्याही वर्ग, जात, धर्माच्या सीमा न मानता सर्वांसाठी खुला आहे. प्रत्येक स्त्रीने यात सहभागी होऊन मनमुराद आनंद घ्यावा.” सध्याच्या नवरात्रोत्सवात गरबा-दांडियाचे वेगळे महत्त्व आहे. मात्र, अनेक ठिकाणी हा उत्सव विशिष्ट गटापुरता मर्यादित राहतो. याच्या पार्श्वभूमीवर, राहुरीत गेल्या पाच वर्षांपासून नाथ प्रतिष्ठानकडून सातत्याने सामाजिक समता आणि महिला सक्षमीकरणाचा संदेश देत हा उपक्रम राबविला जात आहे.

या उपक्रमामुळे महिलांमध्ये एकता, आनंद, सांस्कृतिक अभिमान आणि सार्वजनिक सहभाग मोठ्या प्रमाणात वाढला आहे. रंगीबेरंगी पारंपरिक वेशभूषेत सजलेल्या महिलांनी गरबा-दांडियाचा जल्लोष करीत सांस्कृतिक एकात्मतेचे दर्शन घडवले. राहुरी शहरात सर्वसमावेशक पद्धतीने राबविला जाणारा हा दांडिया महोत्सव सांस्कृतिक चळवळ ठरत असून, भविष्यात याचा आवाका वाढविण्याचा निर्धार नाथ प्रतिष्ठानने व्यक्त केला आहे.


Spread the love

Leave a Reply

error: Content is protected !!