शेवगाव येथे धनगर समाजाचे धरणे आंदोलन – मागण्या मान्य न केल्यास आमदार निवासस्थानी तीव्र आंदोलनाचा इशारा

विशेष प्रतिनिधी / गंगासागर पोकळे : महाराष्ट्रातील धनगर समाज आपले संविधानिक हक्क आणि आरक्षणाचा प्रश्न मागील अनेक दशकांपासून सोडविण्यासाठी संघर्ष करत आहे. अलीकडेच जालना येथे उपोषण योद्धा दिपक बोऱ्हाडे यांनी आमरण उपोषण सुरू केले असून, त्यांच्या या लढ्याला राज्यभरातून धनगर बांधवांनी अभूतपूर्व प्रतिसाद दिला आहे. तरीसुद्धा शासनाने अद्याप मागण्यांकडे गांभीर्याने लक्ष न दिल्यामुळे समाजात असंतोष वाढत आहे.

याच पार्श्वभूमीवर सकल धनगर समाज, शेवगाव यांच्या वतीने दि. २६ सप्टेंबर २०२५ रोजी एकदिवसीय धरणे आंदोलन करण्यात आले. या वेळी शासनाने खालील मागण्यांवर तातडीने निर्णय घ्यावा, अशी मागणी करण्यात आली –
1. धनगर समाजास तात्काळ एस.टी. आरक्षणाचा लाभ द्यावा.
2. उपोषणकर्ते दिपकभाऊ बोऱ्हाडे यांच्या मागण्यांना शासनाने तत्काळ मान्यता द्यावी.
3. समाजाच्या सर्वांगीण विकासासाठी विशेष निधी व योजना लागू कराव्यात.

आंदोलकांनी इशारा दिला की, जर शासनाने या मागण्यांवर ठोस भूमिका घेतली नाही, तर राज्यभर तीव्र आंदोलन छेडण्यात येईल. तसेच, येत्या २९ सप्टेंबर रोजी आमदार निवासस्थानी तीव्र स्वरूपाचे आंदोलन करण्यात येणार असल्याचे सांगण्यात आले. या आंदोलनात शेवगाव तालुक्यातील सकल धनगर समाज मोठ्या संख्येने उपस्थित होता.