तुळजापूर, दि. 27 (चंद्रकांत हगलगुंडे) : खानापूर–उमरगा राष्ट्रीय महामार्गावरील उड्डाणपूल व बसस्थानक ते चिवरी पाटी मार्गावरील रस्त्यांची दुरवस्था अवघ्या महिनाभरातच उघड झाली आहे. दर्जाहीन कामामुळे रस्त्याचे अक्षरशः चाळण होऊन खड्ड्यांचा पाऊस पडला असून वाहनचालकांना प्रचंड त्रास सहन करावा लागत आहे.
एस. आर. 24 न्यूज वर 24 सप्टेंबर रोजी “अवघ्या महिनाभरातच उड्डाण पुलावर खड्ड्यांचे साम्राज्य” या मथळ्याखाली बातमी प्रकाशित झाल्यानंतर आज (दि. 27) मलमपट्टीने खड्डे बुजवण्यास सुरुवात करण्यात आली. मात्र हे काम ‘पुढे मलमपट्टी, मागे सपाट’ अशा केविलवाण्या पद्धतीने सुरू असून नागरिकांमध्ये तीव्र संताप व्यक्त होत आहे. गेल्या 14 वर्षांपासून हा महामार्ग ‘वनवासात’ असून अद्याप अपूर्ण आहे. अधिकारी, गुत्तेदार आणि लोकप्रतिनिधींच्या उदासीनतेमुळे काम कधी पूर्ण होणार, असा संतप्त सवाल वाहनचालक व प्रवासी करत आहेत.
सोलापूर–हैदराबाद हा राष्ट्रीय महामार्ग असल्याने वाहनांची मोठ्या प्रमाणावर रेलचेल असते. मात्र गुत्तेदारांकडून फक्त थातूरमातूर मलमपट्टी करून शासनाची दिशाभूल केली जात असल्याची टीका होत आहे. निकृष्ट कामामुळे यापूर्वी अनेक अपघात होऊन जीवितहानी झाली आहे. त्यामुळे महामार्ग विभागाच्या वरिष्ठ अधिकाऱ्यांनी तातडीने चौकशी करून दोषींवर कठोर कारवाई करावी, अशी मागणी होत आहे.
“१४ वर्षांपासून चालू असलेले हे निकृष्ट व अर्धवट काम जगाच्या इतिहासात नवा विक्रम ठरत असून, या कामामागील खरे ‘शुक्राचार्य’ कोण, याबाबत सर्वत्र मौन दिसत आहे. केंद्रीय वाहतूक मंत्र्यांनी स्वतः लक्ष घालून कारवाई करावी,” अशी जनतेची जोरदार मागणी होत आहे.
Leave a reply
