राहुरी प्रतिनिधी / ज्ञानेश्वर सुरशे : बनावट दिव्यांग प्रमाणपत्र तयार करून शासनाच्या विविध योजनांचा लाभ घेतल्याप्रकरणी राहुरी पोलिसांनी पती-पत्नीला अटक केली आहे. याप्रकरणी राहुरी पोलीस ठाण्यात गुन्हा रजि. नं. 613/2025, भादंवि कलम 468 (खोटे कागदपत्र बनवणे), 471 (खोटे कागदपत्र वापरणे) अंतर्गत गुन्हा दाखल करण्यात आला आहे. गुन्ह्यातील आरोपी ताज निसार पठाण आणि रुबीना ताज पठाण (रा. देवळाली प्रवारा) यांनी बनावट दिव्यांग प्रमाणपत्र तयार करून संजय गांधी निराधार योजना तसेच इतर दिव्यांग कल्याण योजनांचा लाभ घेतल्याचे उघड झाले. याबाबत ग्राम महसूल अधिकारी श्री. दीपक नामदेव साळवे (देवळाली प्रवारा) यांनी फिर्याद दिली होती.
तपासाअंती राहुरी पोलिसांनी दोघांना ताब्यात घेऊन अटक केली असून, न्यायालयात हजर केल्यावर त्यांना चार दिवसांची पोलिस कोठडी सुनावण्यात आली आहे. सरकारतर्फे शासकीय अभियोक्ता श्री. पाटील यांनी युक्तिवाद केला. या गुन्ह्यामागील मूळ सूत्रधाराचा शोध घेणे, तसेच बनावट प्रमाणपत्र तयार करण्यात सहकार्य करणारे सिव्हिल हॉस्पिटलमधील व इतर कार्यालयातील अधिकारी-कर्मचाऱ्यांची चौकशी करून आवश्यक ती कारवाई करण्यात येणार आहे. सदर प्रकरणाचा तपास पोलीस उपनिरीक्षक राजु जाधव, पो.कॉ. गणेश लिपणे आणि महिला पो.कॉ. वृषाली कुसळकर करत आहेत.
सदरची कारवाई पोलीस अधीक्षक मा. श्री. सोमनाथ घार्गे, अपर पोलीस अधीक्षक मा. श्री. सोमनाथ वाकचौरे, उपविभागीय पोलीस अधिकारी डॉ. बसवराज शिवपुजे यांच्या मार्गदर्शनाखाली पो.नि. संजय ठेंगे, पोसई राजु जाधव, पो.ना. संतोष दरेकर, पो.हे.कॉ. राहुल यादव, पो.कॉ. शेषराव कुटे, मपो.कॉ. अंजली गुरव यांनी केली.
Leave a reply
