तुळजापूर, दि. 31 (प्रतिनिधी – चंद्रकांत हगलगुंडे) : आजच्या काळात जेथे स्वहिताचा विचार अग्रक्रमावर असतो, तेथे निस्वार्थपणे समाजहितासाठी कार्य करणारे पत्रकार हे लोकशाहीचे खरे प्रहरी ठरतात. अशा पत्रकारांमध्ये सकारात्मक दृष्टिकोन आणि समाजाभिमुख विचारसरणी जपणारे संजू आलूरे यांचे कार्य प्रेरणादायी असल्याचे गौरवोद्गार ८ फार्म ग्रुपचे सदस्य तथा युवा उद्योजक गुणवंत मुळे यांनी काढले.अणदूर येथे पत्रकार संजू आलूरे यांच्या वाढदिवसानिमित्त आयोजित सत्कार समारंभात ते बोलत होते. कार्यक्रमाच्या प्रारंभी ज्येष्ठ पत्रकार चंद्रकांत हगलगुंडे आणि दयानंद काळुंके यांच्या हस्ते आलूरे यांचा सत्कार करण्यात आला.
या प्रसंगी बोलताना आलूरे म्हणाले की, “सर्वसामान्य जनतेच्या प्रश्नांसाठी लढण्याची प्रेरणा मला माझ्या आजोबांकडून मिळाली. समाजहितासाठी लेखणीचा उपयोग करण्याची शिकवण मी आजही मनापासून जोपासतो. मित्रपरिवार आणि मार्गदर्शकांचा आदर्श माझ्या वाटचालीस सतत प्रेरणा देतो.”
समारंभास सेवानिवृत्त मुख्याध्यापक यशवंत मोकाशी, स्वामी सर, शिवशंकर तिरगुळे, सचिन तोग्गी, सचिन मुळे, काकासाहेब पोतदार, राजेश पाटील, भाषा शेख, अजय करपे, दयानंद नरे, राम भंडारकवठे, राजेंद्र मुळे तसेच सहमत मित्रपरिवार मोठ्या संख्येने उपस्थित होते.
Leave a reply
