अहिल्यानगरमध्ये वैद्यकीय क्षेत्रात खळबळ! पाच डाॅक्टरांकडून अवयवांची ‘तस्करी’, मृतदेहाची परस्पर विल्हेवाट लावल्या प्रकरणी गुन्हा डाॅक्टरांवर दाखल

अहिल्यानगर प्रतिनिधी / वसंत रांधवण : कोरोनाच्या काळात बनावट पॉझिटिव्ह रिपोर्ट तयार करून चुकीचे उपचार दिल्याने रुग्णाचा मृत्यू झाल्याचा धक्कादायक प्रकार उघडकीस आला आहे. इतकेच नव्हे, तर मृत्यू झाल्यानंतर मृतदेहाची अवयव तस्करीसाठी परस्पर विल्हेवाट लावल्याचा गंभीर आरोप करण्यात आला आहे. या प्रकरणात मुंबई उच्च न्यायालयाच्या औरंगाबाद खंडपीठाने हस्तक्षेप करत, अहिल्यानगर शहरातील पाच नामांकित डॉक्टरांसह एका अनोळखी कर्मचाऱ्याविरुद्ध गुन्हा दाखल करण्याचे आदेश दिले आहेत. या प्रकरणामुळे जिल्ह्यातील वैद्यकीय क्षेत्रात एकच खळबळ उडाली आहे.

न्युक्लिअस हॉस्पिटलचे डॉ. गोपाळ बहुरुपी, डॉ. सुधीर बोरकर (रा. पाईपलाईन रोड, सावेडी), डॉ. सचिन पांडुळे, डॉ.अक्षयदीप झावरे, डॉ.मुकुंद तांदळे (सर्व रा. नगर) तसेच डॉ. विखे पाटील मेमोरियल हॉस्पिटल लॅबचे तज्ञ डॉक्टर आणि इतर कर्मचाऱ्यांविरुद्ध कटकारस्थान, फसवणूक आणि मृत्यूस कारणीभूत ठरणे या गंभीर कलमांखाली गुन्हा दाखल करण्यात आला आहे.

फिर्यादी अशोक बबनराव खोकराळे (वय 47, रा. सावेडी) यांनी आपल्या वडिलांच्या मृत्यूबाबत न्यायालयात धाव घेतली होती. त्यांचे वडील बबनराव खोकराळे (वय 79) यांना 13 ऑगस्ट 2020 रोजी घशात खवखव आणि बद्धकोष्ठतेचा त्रास होत होता. त्यांना डॉ. सचिन पांडुळे यांच्या पटियाला हाऊस येथील कोविड सेंटरमध्ये दाखल करण्यात आले. सर्व चाचण्यांचे रिपोर्ट नॉर्मल असूनही, त्यांना निरीक्षणाखाली ठेवण्यात आले. दुसऱ्या दिवशी, 14 ऑगस्टला, फिर्यादीला न कळवता रुग्णाला न्युक्लिअस हॉस्पिटलमध्ये हलवण्यात आले. त्यानंतर बबनराव यांनी आपल्या मुलांना फोन करून सांगितले “मला बेडला बांधून ठेवले आहे, खूप रक्त काढले, हे लोक मला मारून टाकतील, मला इथून घेऊन जा.”

फिर्यादी रुग्णालयात पोहोचले असता, डॉक्टरांनी ‘रुग्ण नॉर्मल आहे’ असे सांगून त्यांना भेटू दिले नाही. काही वेळाने अचानक त्यांना ‘कोरोना पॉझिटिव्ह’ असल्याचे सांगून डिस्चार्ज नाकारण्यात आला. १८ ऑगस्ट २०२० रोजी वडिलांच्या मृत्यूची बातमी मिळाली. हॉस्पिटलने ₹१.८४ लाखांचे बिल भरल्यानंतर मृतदेह सिव्हिल हॉस्पिटलला पाठवल्याचे सांगितले. मात्र, फिर्यादीने सिव्हिल हॉस्पिटल, अमरधाम आणि न्युक्लिअस हॉस्पिटलमध्ये शोधाशोध करूनही वडिलांचा मृतदेह आजपर्यंत सापडलेला नाही.

या प्रकरणी जिल्हा शल्यचिकित्सकांनी नेमलेल्या समितीनेही “गैरव्यवहार, निष्काळजीपणा आणि हलगर्जीपणा” झाल्याचे अहवालात स्पष्ट केले. त्यानंतर उच्च न्यायालयाच्या आदेशानुसार पोलिसांनी अखेर गुन्हा दाखल केला आहे. फिर्यादीच्या तक्रारीनुसार, कोरोना नसताना खोटा आरटीपीसीआर रिपोर्ट तयार करण्यात आला, पैसे उकळण्यासाठी जाणीवपूर्वक चुकीचे उपचार दिले, रुग्णाला धमकावून बेडला बांधून ठेवले, जेवण न देणे, एकाच दिवशी दोन हॉस्पिटलमध्ये बोगस उपचार दाखवणे, आणि पुरावा नष्ट करण्यासाठी तसेच अवयव तस्करीच्या हेतूने मृतदेहाची विल्हेवाट लावणे, असे गंभीर आरोप करण्यात आले आहेत.या घटनेतील प्रकरणाचा पुढील तपास पोलीस निरीक्षक आनंद कोकरे करीत आहेत.