राहुरी प्रतिनिधी (सोमनाथ वाघ) : मानोरी गावातील दोन कुस्तीपटू विद्यार्थिनींनी शालेय कुस्ती स्पर्धांमध्ये उल्लेखनीय कामगिरी बजावत गावाचे नाव उजळवले आहे. कु. श्रावणी अमोल तनपुरे (वजनगट ५३ कि ) हिने जिल्हास्तरीय कुस्ती स्पर्धेत द्वितीय क्रमांक पटकावत उल्लेखनीय यश संपादन केले आहे. तर कु. ईश्वरी पोपट जाधव (वजनगट ४९ कि.) हिची उपविभागीय स्तरावरील कुस्ती स्पर्धेसाठी निवड झाली आहे.
या दोन्ही खेळाडूंनी अत्यंत कठोर परिश्रम, सातत्यपूर्ण सराव आणि जिद्दीच्या जोरावर हे यश मिळवले आहे. ग्रामीण भागातील मुलींनी कुस्तीच्या मैदानात अशी चमकदार कामगिरी करणे ही अभिमानास्पद बाब असून, या यशामुळे संपूर्ण गावात आनंदाचे वातावरण निर्माण झाले आहे. या यशस्वी खेळाडूंचा गौरव करण्यासाठी आज सकाळी हनुमान मंदिराच्या समोरचे सभा मंडपामध्ये भव्य सत्कार समारंभाचे आयोजन करण्यात आले होते. बजरंग तालीम संघ आणि मानोरी ग्रामस्थांच्या संयुक्त विद्यमाने हा कार्यक्रम अत्यंत उत्साहात पार पडला. सत्कार समारंभात या दोन्ही खेळाडूंना शाल व पुष्पगुच्छ देऊन गौरविण्यात आले. गावातील नागरिकांनी मोठ्या संख्येने उपस्थित राहून या दोघींवर कौतुकाचा वर्षाव केला.
या कार्यक्रमास संभुगिरी महाराज गोसावी, लक्ष्मण महाराज चौगुले, लोकनियुक्त सरपंच सौ. ताराबाई वाघ, माजी संचालक निवृत्ती आढाव, माजी उपसभापती रविद्र आढाव, माजी चेअरमन भिमराज वाघ, माजी संचालक उत्तमराव वाघ, युवा नेते पोपटराव पोटे, युवा नेते बापूसाहेब वाघ, तंटामुक्ती अध्यक्ष अण्णासाहेब ठुबे, सोसायटीचे संचालक भास्कर भिंगारे, ग्रामपंचायत सदस्य शामराव आढाव, पोलीस पाटील भाऊराव आढाव, अँड संजय पवार, गोकुळदास आढाव सर, भाऊसाहेब आढाव, बाळासाहेब पोटे, पै.संजय डोंगरे, चंद्रभान आढाव, एकनाथ थोरात, नानासाहेब तनपुरे, फक्कडभाई शेख, सोपान आढाव, कचरूभाऊ आढाव, चांदभाई शेख, अमोल तनपुरे, भाऊराव चोथे, जितेंद्र तनपुरे, सागर भिंगारे यांच्यासह अनेक मान्यवरांनी उपस्थित राहून कार्यक्रमाची शोभा वाढवली.
या गुणवंत विद्यार्थिनींच्या यशाबद्दल गावकऱ्यांनी विशेष अभिनंदन केले असून, भविष्यात त्या दोघीही राज्य व राष्ट्रीय स्तरावर उत्तुंग यश संपादन करतील, असा विश्वास व्यक्त करण्यात आला आहे.कुस्ती क्षेत्रात ग्रामीण भागातील मुलींनी दाखवलेली कामगिरी इतर विद्यार्थ्यांसाठी प्रेरणादायी ठरत असून, अशा खेळाडूंना योग्य मार्गदर्शन, आधार व सुविधा उपलब्ध झाल्यास त्या आंतरराष्ट्रीय स्तरावरदेखील भारताचे नाव उज्वल करतील, असे मत यावेळी मान्यवरांनी व्यक्त केले.
मानोरीच्या दोन तरुणींचा कुस्तीमध्ये उल्लेखनीय पराक्रम; ग्रामस्थांकडून श्रावणी तनपुरे व ईश्वरी जाधव यांचा सत्कार

0Share
Leave a reply












