राहुरी ग्रामीण प्रतिनिधी (आर. आर. जाधव) : राहुरी तालुक्यातील वरवंडी गावात आज दुपारी एका ४२ वर्षीय इसमाने राहत्या घरात छताला गळफास घेऊन आत्महत्या केल्याची दुर्दैवी घटना उघडकीस आली आहे. मृताचे नाव नवनाथ सखाराम ढगे (वय ४२, रा. वरवंडी) असे आहे.
मिळालेल्या माहितीनुसार, आज दिनांक ८ ऑक्टोबर रोजी दुपारी एक वाजेच्या सुमारास नवनाथ ढगे यांनी आपल्या राहत्या घरात दोरीच्या साहाय्याने गळफास घेतला. ते नेहमीप्रमाणे दुपारी झोपायला गेले असल्याने घरातील लोकांनी त्यांच्याकडे लक्ष दिले नाही. परंतु बराच वेळ झाला तरी ते बाहेर आले नाहीत म्हणून त्यांचा भाऊ कानिफनाथ सखाराम ढगे यांनी खिडकीतून पाहिले असता नवनाथ ढगे हे गळफास घेतलेल्या अवस्थेत दिसून आले.
त्यानंतर तातडीने घरच्यांनी आणि स्थानिक नागरिकांनी खिडकी तोडून मृतदेह खाली घेतला. हा प्रकार पाहताच घरात आई, भाऊ व भावजय यांनी हंबरडा फोडला आणि परिसरात एकच खळबळ उडाली.यानंतर ऋषिकेश अडसूरे, सखाराम बरे व नितीन बरे यांनी तातडीने मृतदेह खाजगी वाहनातून राहुरी ग्रामीण रुग्णालयात आणला असता तेथे वैद्यकीय अधिकाऱ्यांनी तपासणी करून नवनाथ ढगे यांना मृत घोषित केले.
या घटनेची माहिती राहुरी पोलिसांना देण्यात आली असून पोलिसांनी पुढील तपास सुरू केला आहे. आत्महत्येचे नेमके कारण मात्र अद्याप समजू शकलेले नाही.घटनेने वरवंडी गावात हळहळ व्यक्त केली जात असून, ढगे कुटुंबावर शोककळा पसरली आहे.
Leave a reply
