राहुरी प्रतिनिधी (सोमनाथ वाघ) : राहुरी तालुक्यातील मानोरी गावात बिबट्याच उपद्रव दिवसेंदिवस वाढतोय. मंगळवारी (दि. ७ ऑक्टोबर) पहाटे मकासरे वस्तीवर बिबट्याने शेडमध्ये शिरून थैमान घातले. एका शेळीचा जागीच फडशा पाडला, तर दुसरी गंभीर जखमी झाली. तिसऱ्या शेळीला तोंडात धरून बिबट्या पळून गेला. ग्रामस्थांची चाहूल लागताच कपाशीच्या शेतीकडे धूम ठोकली.
मच्छिंद्र भागवत मकासरे यांच्या घराशेजारील शेडमध्ये पहाटे चारच्या सुमारास ही घटना घडली. शेळ्यांच्या किंकाळ्यांनी घरातील मंडळींची झोप मोडली. बाहेर येऊन पाहताच बिबट्याचा प्रत्यक्ष थरार उघड झाला. ग्रामस्थांनी आरडाओरड केल्यावर बिबट्या कपाशीच्या शेतातून जंगलात पसार झाला.
वनविभागाला घटनेची माहिती देण्यात आली. काही वेळातच वन कर्मचारी दाखल झाले. पंचनामा करताना बिबट्याचे ठसे आणि शेळ्यांचे अवशेष सापडले आहेत. दरम्यान, मानोरी, मकासरे, गणपतवाडी परिसरात गेल्या काही आठवड्यांपासून बिबट्याचे दर्शन वारंवार घडत आहे. काही दिवसांपूर्वी गणपतवाडीत एका कालवडीचा बिबट्याने फडशा पाडला होता. तसेच कोंबड्या, कुत्रे, शेळ्यांवरही बिबट्याचे हल्ले सुरूच आहेत.
या घटनांमुळे ग्रामस्थांमध्ये भीतीचं वातावरण पसरलं आहे. शेतकरी, महिला व लहान मुलं रात्री घराबाहेर पडायला घाबरत आहेत. मोकळ्या शिवारात काम करणाऱ्यांचंही जीव टांगणीला लागलं आहे. वनविभागाने तातडीने बिबट्याचा बंदोबस्त करावा, अशी जोरदार मागणी ग्रामस्थांनी केली आहे.
Leave a reply
