राहुरी तालुक्यात मुसळधार पावसाने शेतीचे मोठे नुकसान; शेतकऱ्यांचा रोष, पंचनाम्याची व मदतीची मागणी

राहुरी प्रतिनिधी ( सोमनाथ वाघ) : गेल्या चार दिवसांपासून राहुरी तालुक्यात सुरू असलेल्या मुसळधार पावसामुळे शेतकऱ्यांचे मोठे नुकसान झाले आहे. विशेषतः तालुक्याच्या पूर्व भागात शेतकऱ्यांच्या पिकातच तळ्यांचे स्वरूप निर्माण झाले असून, त्यामुळे हतबल झालेल्या शेतकऱ्यांनी या पाण्यात पोहून आपला रोष व्यक्त केला. पिकांचे तातडीने पंचनामे करून शेतकऱ्यांना नुकसानभरपाई द्यावी, अशी मागणी करण्यात येत आहे.

 

सलग चार दिवस झालेल्या पावसामुळे सोयाबीन, कापूस, कांदा यासह विविध हंगामी पिके पाण्याखाली गेली आहेत. काल (सोमवारी) संध्याकाळी सलग चार तास झालेल्या मुसळधार पावसाने परिस्थिती आणखीनच बिकट झाली. खुडसरगाव, पाथरे, वळण, मानोरी, आरडगाव, मालुंजा, माहेगाव, शेनवडगाव, कोपरे, वाजुळपोई, तिळापुर, मांजरी, कोंढवड, शिलेगाव, तांदुळवाडी, केंद्रळ आदी गावांमधील पिकांचे मोठ्या प्रमाणावर नुकसान झाले आहे.

 

सोयाबीनला मोड आले असून कांद्याची रोपे वाहून गेली आहेत. खुडसरगाव व टाकळीमियां येथे रयत क्रांती संघटनेचे जिल्हाध्यक्ष सतीश पवार यांनी कपाशी पिकात साचलेल्या पाण्यात पोहून शासनाचे लक्ष वेधण्याचा प्रयत्न केला.

दरम्यान, लालजी निशाणे, रामेश्वर पवार, शिवराज पवार, माजी उपसभापती रवींद्र आढाव, सुरेश निमसे, नानासाहेब जुंधारे, सुनील मोरे, प्रकाश देठे, सतीश पवार आदी शेतकऱ्यांनी नुकसानग्रस्त भागातील पंचनामे करून शासनाकडे तातडीने मदतीची मागणी केली आहे.