महात्मा फुले कृषी विद्यापीठ, राहुरी प्रशासनाकडून प्रकल्पग्रस्त भरती प्रक्रियेत जाणीवपूर्वक विलंब,  यशवंत सेनेचे जिल्हाध्यक्ष विजय तमनर यांचा आमरण उपोषणाचा इशारा

राहुरी विद्यापीठ / आर. आर. जाधव : अहिल्यानगर जिल्ह्याचे पालकमंत्री मा. ना. राधाकृष्ण विखे पाटील यांच्या पुढाकाराने महात्मा फुले कृषी विद्यापीठ, राहुरी प्रकल्पासाठी जमिनी संपादित केलेल्या प्रकल्पग्रस्तांना शासन नियमांनुसार सेवेत सामावून घेण्यासाठी विशेष भरती प्रक्रियेचा निर्णय घेण्यात आला होता. त्यानुसार विद्यापीठाने दि. ३१ डिसेंबर २०२४ रोजी जाहिरात प्रसिद्ध केली होती. याबद्दल प्रकल्पग्रस्त उमेदवार व त्यांच्या कुटुंबीयांनी शासन व मंत्रीमंडळाचे आभार मानले होते.

मात्र, प्रकल्पग्रस्त भरती प्रक्रियेत होणारा सातत्यपूर्ण विलंब आणि अन्याय लक्षात घेता तत्कालीन कृषी मंत्री मा. माणिकराव कोकाटे यांनी दि. ३० जून २०२५ रोजी मंत्रालयात बैठक घेऊन, लेखी परीक्षा नसलेल्या वर्ग-४ पदांवरील नियुक्त्या दि. ३१ जुलै २०२५ पर्यंत पूर्ण करण्याचे आदेश दिले होते. तरीदेखील ठराविक मुदतीत कोणतीही कार्यवाही झाली नाही. परिणामी, प्रकल्पग्रस्त उमेदवारांना १७ ऑगस्ट रोजी विद्यापीठाच्या मुख्य प्रवेशद्वारासमोर आमरण उपोषण करावे लागले. त्यानंतर वर्ग-४ संवर्गाच्या व्यावसायिक चाचणी परीक्षा २५ ऑगस्ट रोजी घेण्यात आल्या व त्याचा निकाल ८ सप्टेंबरला जाहीर करण्यात आला.

निकाल जाहीर होऊनही अद्याप नियुक्ती आदेश निर्गमित करण्यात आले नाहीत. याबाबत विद्यापीठ प्रशासन मौन बाळगत असून, आदेश प्रलंबित का ठेवण्यात आले आहेत याविषयी उलटसुलट चर्चा सुरू आहे. विद्यापीठाचा कारभार सध्या प्रभारी कुलगुरूंवर असल्याने नियुक्त्यांबाबत गोंधळ व दिरंगाई सुरू असल्याचा आरोप करण्यात येत आहे.

या पार्श्वभूमीवर यशवंत सेनेचे जिल्हाध्यक्ष विजय तमनर यांनी कृषी मंत्री व पालकमंत्र्यांना निवेदन सादर केले. तसेच आज कुलगुरूंनाही निवेदन देण्यात आले असून, त्यांनी वर्ग-४ नियुक्ती आदेश निर्गमित करण्यास कोणतीही अडचण नसल्याचे स्पष्ट केले आहे. तरीदेखील नियुक्ती आदेश तातडीने निघाले नाहीत आणि वर्ग-३ संवर्गाच्या परीक्षेचे वेळापत्रक जाहीर झाले नाही, तर येत्या १७ ऑक्टोबर २०२५ पासून दिवाळीच्या काळात मी स्वतः आमरण उपोषणास बसणार आहे, असा इशारा विजय तमनर यांनी दिला आहे. यामुळे प्रकल्पग्रस्त उमेदवार व त्यांच्या कुटुंबीयांमध्ये प्रचंड असंतोष असून, प्रशासनाच्या दिरंगाईवर सर्वत्र टीका होत आहे.