मानोरी (प्रतिनिधी) / सोमनाथ वाघ : शेतकऱ्यांचा जिव्हाळ्याचा व कृतज्ञतेचा सण म्हणून ओळखला जाणारा बैलपोळा साजरा करण्याची लगबग तालुक्यातील गावागावांत सुरू झाली आहे. शेतकऱ्यांच्या जीवनात बैल एकप्रकारे कुटुंबातील सदस्यासारखाच असतो. शेतीची सारी ओझी पेलणाऱ्या या बैलांचा मान-सन्मान करण्याचा दिवस म्हणजे पोळा. त्यामुळे ग्रामीण भागात उत्साहाचे वातावरण पाहायला मिळत आहे.
गावागावच्या बाजारपेठांत बैल सजावटीसाठी लागणाऱ्या वस्तूंची रेलचेल सुरू आहे. झेंडे, गोंडे, झुल, रंगीबेरंगी कांकरे, पितळी घंटा, हार व शोभेच्या वस्तूंची विक्री जोरात आहे. शेतकरी आपल्या बैलांना उटणे, तेल-मसाज, आंघोळ घालून त्यांना विशेष सजवतात. बैलांच्या शिंगांना रंगीबेरंगी रंग लावून सुंदर रेखाटने केली जातात.
या दिवशी बैलांना गोड धान्य, पुरणपोळी, भाकरी, चारा, हरभऱ्याच्या पानांची फडसणी इत्यादी पदार्थ प्रेमाने खाऊ घातले जातात. पोळ्यानंतर गावोगावी मिरवणुकीचे आयोजन करण्यात येऊन हनुमान मंदिर परिसरात बैलजोड्या दर्शनासाठी आणल्या जातात. ढोल-ताशांच्या गजरात व डिजेच्या निनादात सजवलेल्या बैल जोडांची रांगच पाहण्यासारखी असते. काही ठिकाणी सामूहिक महाप्रसादाचे आयोजन केले जाते.
धार्मिक दृष्टिकोनातूनही या सणाला विशेष महत्त्व आहे. शेतकरी आपल्या मेहनतीला प्रत्यक्ष हातभार लावणाऱ्या बैलाला देवत्व देऊन त्यांची पूजा करतो. यामुळे मानवी जीवनात “निसर्ग व प्राणीमात्रांबद्दल कृतज्ञता व्यक्त करण्याची ही एक संस्कृती” जपली जाते.
बैल जोडयांना पोळ्याचा दिवस त्यांच्या दैनंदिन श्रमाला दिलासा देणारा आणि आनंद साजरा करणारा ठरतो. त्यामुळे गावोगावी या सणाची रंगत दिवसेंदिवस वाढत असून लहानांपासून थोरांपर्यंत सर्वजण या उत्सवात सहभागी होणार आहे.
Leave a reply
