राहुरी कृषी विद्यापीठाच्या कुलगुरूपदाची निवड प्रक्रिया वादग्रस्त होण्याच्या शक्यता, निवड समितीत राज्याबाहेरील तज्ज्ञांचा समावेश; निवड समितीत राज्याबाहेरील तज्ज्ञांचा समावेश ; शिक्षण क्षेत्रातून प्रश्न उपस्थित

राहुरी विद्यापीठ प्रतिनिधी  (आर.आर. जाधव) : परभणी कृषी विद्यापीठानंतर आता राहुरी येथील महात्मा फुले कृषी विद्यापीठाच्या कुलगुरूपदाची निवड प्रक्रिया वादाच्या भोवऱ्यात सापडण्याची शक्यता निर्माण झाली आहे. राज्याबाहेरील तज्ज्ञांची निवड समितीत व समन्वय समितीत नियुक्ती झाल्याने शिक्षण क्षेत्रात यावरून चर्चांना उधाण आले आहे.

सध्या राहुरी कृषी विद्यापीठाचे कुलगुरूपद मागील सहा महिन्यांपासून रिक्त आहे. कुलगुरू डॉ. प्रशांतकुमार पाटील यांच्या निधनानंतर नव्या कुलगुरूच्या निवडीसाठी प्रक्रिया सुरू करण्यात आली आहे. या प्रक्रियेत कोईम्बतूरच्या भरतियार विद्यापीठातील गणित विभागाचे प्राध्यापक डॉ. एस. सर्वानन यांची समन्वय अधिकारी म्हणून नियुक्ती झाली आहे. राज्याबाहेरील तज्ज्ञाची या समितीत निवड का करण्यात आली, असा प्रश्न विविध शैक्षणिक वर्तुळांतून उपस्थित होत आहे.

राज्यपाल सी. पी. राधाकृष्णन यांच्या हस्ते अंतिम नियुक्ती होणार आहे. मात्र राज्यपाल स्वतः कोईम्बतूर येथील असताना समितीतही कोईम्बतूरमधील प्राध्यापकाचा समावेश असणे हा केवळ योगायोग की यामागे काही वेगळे कारण आहे, यावर चर्चा रंगू लागली आहे.

यापूर्वी परभणी कृषी विद्यापीठाच्या कुलगुरूपदी उत्तर प्रदेशातील डॉ. इंद्रमणी यांची नियुक्ती झालेली आहे. त्यामुळे आता राहुरी विद्यापीठातही बाहेरील राज्यातील कुलगुरू नेमला जाण्याची शक्यता नाकारता येत नाही. परिणामी राज्यातील कृषी विद्यापीठांमधील कुलगुरू निवड प्रक्रिया वादग्रस्त होण्याची चिन्हे स्पष्ट दिसू लागली आहेत.