राहुरी (सोमनाथ वाघ) : राहुरी तालुक्यातील पूर्व भागातील आरडगाव येथे सोमवारी पहाटे बिबट्याच्या हल्ल्यात दोन मेंढ्या आणि एका कोकराचा बळी गेल्याची धक्कादायक घटना उघडकीस आली. या घटनेमुळे संपूर्ण परिसरात भीतीचे सावट निर्माण झाले आहे.मिळालेल्या माहितीनुसार, शेतकरी संजय साळुंके व संतोष साळुंके यांच्या वस्तीशेजारील शेतात मेंढपाळाची मेंढरे चरत असताना अचानक बिबट्याने धाड टाकत हल्ला चढवला. काही क्षणात दोन मेंढ्या आणि एका कोकराला ठार करत बिबट्या अंधाराचा फायदा घेत पसार झाला.
ग्रामस्थांनी दिलेल्या माहितीनुसार, गेल्या काही दिवसांपासून परिसरात बिबट्याचा गुप्त संचार सुरू असल्याच्या चर्चा होत होत्या. काही नागरिकांना त्याचे प्रत्यक्ष दर्शन देखील झाले असून यापूर्वीही काही लोकांवर हल्ल्याच्या घटना समोर आल्या आहेत. त्यामुळे परिस्थिती अधिक गंभीर बनली असून ग्रामस्थांमध्ये भीतीचे वातावरण पसरले आहे.
या घटनेमुळे ऊस तोडणी कामगार, मेंढपाळ, शालेय विद्यार्थी, दुग्ध व्यवसायिक, शेतमजूर महिला तसेच रात्री पिकांना पाणी देणारे शेतकरी यांच्यात मोठी दहशत निर्माण झाली आहे. संध्याकाळीनंतर गावातील हालचाल लक्षणीयरीत्या कमी झाली असून नागरिक सतर्कतेने वावरण्यास बाध्य झाले आहेत. परिस्थितीची गंभीर दखल घेऊन ग्रामस्थांनी वनविभागाकडे तातडीने पिंजरा लावून बिबट्याचा बंदोबस्त करण्याची मागणी केली आहे.
Leave a reply
