तुळजापूर प्रतिनिधी (चंद्रकांत हगलगुंडे) : धाराशिव जिल्ह्यात प्रतिष्ठेची मानली जाणारी नळदुर्ग नगरपालिकेची निवडणूक यंदा अधिकच रंगतदार ठरण्याची चिन्हे दिसू लागली आहेत. नगराध्यक्ष पदासाठीची निवडणूक सर्वांच्या उत्सुकतेचे केंद्रबिंदू बनली असून 20 नगरसेवक पदांच्या निवडणुकीत बहुरंगी, बहुढंगी राजकीय सामना रंगणार आहे. राजकीय समीकरणांमधील मोठे बदल आणि नव्या चेहऱ्यांचा प्रवेश पाहता ही निवडणूक न भूतो न भविष्यति ठरण्याची शक्यता वर्तवली जात आहे.
या वेळी नगराध्यक्ष पदासाठी चार मुख्य उमेदवारांमध्ये अटीतटीची लढत रंगणार आहे.भारतीय जनता पार्टीकडून सामाजिक क्षेत्रात सक्रिय व युवा नेतृत्व म्हणून पुढे येणारे बसवराज आप्पा धरणे, नुकताच काँग्रेसमध्ये प्रवेश करून उमेदवारी मिळवलेले उद्योजक अशोक जगदाळे, भाजपातून नाराज होऊन राष्ट्रवादी अजित पवार गटात दाखल झालेले संजय अण्णा बताले, काँग्रेसला सोडून एम.आय.एम. मध्ये प्रवेश करून स्वतंत्र अस्तित्व टिकवण्यासाठी मैदानात उतरलेले शहबाज काझी
राजकीय हवामान बोचऱ्या थंडीच्या पार्श्वभूमीवर दिवसेंदिवस तापत असून विवेक, संताप, नाराजी आणि बदलाची इच्छा हेच मुद्दे मतदारांमध्ये चर्चेत आहेत. निवडणुकीत कोण विजयी होणार, यासंदर्भात अद्याप स्पष्ट संकेत मिळत नसले तरी लढत चार बाजूंनी रंगली आहे.
नगरपालिकेच्या स्थापनेपासून काँग्रेस – राष्ट्रवादीचे वर्चस्व कायम राहिले असले तरी यंदा बदलाची गरज असल्याची भावना सर्वसामान्य मतदारांमध्ये प्रकर्षाने व्यक्त होत आहे. पाण्याचा प्रश्न, रस्त्यांची दयनीय अवस्था, मोठ्या प्रमाणातील अतिक्रमण, दैनंदिन नागरी सुविधा नसल्याची तक्रार यामुळे मतदारांमध्ये असंतोष मोठ्या प्रमाणात असून निवडणुकीत घोषणांपेक्षा कामाला प्राधान्य देण्याचा कल दिसून येत आहे.
दुसरीकडे, गेल्या दोन-अडीच वर्षांत नळदुर्ग नगरपालिका विकासासाठी आमदार राणा दादा पाटील यांनी मोठा निधी उपलब्ध करून दिल्याचे नागरिकांमधून समाधान व्यक्त केले जात आहे. विविध विकास कामांच्या माध्यमातून सर्वसामान्यांच्या प्रश्नांना दिलेले बळ लक्षात घेता याचा फायदा कोणाला मिळणार, हा महत्त्वाचा मुद्दा ठरणार आहे.
निवडणूक केवळ पक्षाच्या नावावर न होता उमेदवारांच्या कसोटीवर आधारित होणार, याबाबत कोणतीही शंका नाही. युवकांचे पाठबळ आणि सर्वसामान्य मतदारांचा कल कोणत्या उमेदवाराकडे झुकणार, हे येत्या काही दिवसांत स्पष्ट होणार आहे. येत्या २ डिसेंबर रोजी होणाऱ्या या निवडणुकीत कोण बाजी मारणार यावर मोठ्या पैजा लावल्या जात असून संपूर्ण जिल्ह्याचे लक्ष नळदुर्गकडे लागले आहे.
Leave a reply
