लग्न समारंभातील दागिने चोरी प्रकरणानंतर राहुरी पोलिसांची कडेकोट कारवाई — सर्व मंगल कार्यालयांना सीसीटीव्ही बसविण्यासाठी पो.नि. संजय ठेंगे यांनी बजावली नोटीस

राहुरी प्रतिनिधी (सोमनाथ वाघ ) : दि. 06 नोव्हेंबर 2025 रोजी विठ्ठला लॉन्स, राहुरी येथे झालेल्या एका लग्न समारंभादरम्यान नवरीचे दागिने सांभाळणाऱ्या ज्येष्ठ महिलेच्या हातातील पर्सेस अज्ञात व्यक्तींनी लंपास केल्याच्या प्रकरणी राहुरी पोलिस ठाण्यात गुन्हा दाखल करण्यात आला होता. तपासामध्ये मंगल कार्यालयातील दर्जेदार सीसीटीव्ही फुटेज उपलब्ध नसल्यामुळे गुन्ह्याचा तपास काही दिवस अडखळला.

तथापि, लग्न समारंभातील फोटोग्राफर व व्हिडिओग्राफर यांच्या कॅमेऱ्यांमध्ये आरोपी स्पष्टपणे कैद झाल्याने तपासाला गती मिळाली. माहितीच्या पडताळणीत आरोपी हे मध्य प्रदेशातील राजगड जिल्ह्यातील पचोड तालुक्यातील बोडा पोलीस स्टेशन हद्दीतील कडिया सांसी गावातील असल्याचे निष्पन्न झाले. या गावातील मोठ्या संख्येने लोक भारतभरातील विवाह समारंभांमध्ये प्रवेश करून नवरीचे मेकअप सुरू असताना दागिने सांभाळणाऱ्या ज्येष्ठ महिलांवर लक्ष ठेवून अल्पवयीन मुलांच्या माध्यमातून दागिने पळविण्याचा गुन्हेगारी रॅकेट चालवित असल्याची माहिती तपासात समोर आली आहे.

या गंभीर पार्श्वभूमीवर राहुरी पोलिसांनी त्वरित प्रतिबंधात्मक कारवाई सुरु केली आहे. राहुरी पोलिस ठाण्याचे पोलीस निरीक्षक संजय ठेंगे यांच्या सूचनेनुसार शहर व तालुक्यातील सर्व मंगल कार्यालय चालक–मालकांना नोटीस बजावण्यात आली असून संपूर्ण परिसर, पार्किंग परिसरासह सर्व ठिकाणी उत्तम दर्जाचे सीसीटीव्ही बसविणे बंधनकारक करण्यात आले आहे. ध्वनी प्रदूषणाच्या नियमांचे उल्लंघन होणार नाही, याची जबाबदारी देखील मंगल कार्यालय चालक–मालकांवर टाकण्यात आली आहे. नोटिसीतील अटींचा भंग झाल्यास प्रचलित कायद्यानुसार कठोर कारवाई केली जाईल, असा इशारा देण्यात आला आहे.