चेडगाव शिवारात बिबट्यांचा थरार; सलग दोन दिवस तीन हल्ल्याच्या प्रयत्नांमुळे नागरिकांमध्ये भीतीचे सावट

ब्राम्हणी प्रतिनिधी / ज्ञानेश्वर सुरशे : राहुरी तालुक्यातील चेडगाव शिवारात बिबट्यांच्या वाढलेल्या वावरामुळे भीतीचे सावट पसरले असून सलग दोन दिवसांपासून ग्रामस्थ व शेतकरी वर्गामध्ये तीव्र दहशत निर्माण झाली आहे. गुरुवार व शुक्रवारी अवघ्या अर्ध्या तासाच्या अंतरात तीन वेगवेगळ्या ठिकाणी बिबट्याने हल्ल्याचा प्रयत्न केल्याने परिस्थिती अधिक गंभीर बनली आहे. गुरुवारी रात्री सुमारे ८.३० वाजता बापूसाहेब सदाशिव ताके हे दूध देऊन दुचाकीवरून घराकडे परतत असताना मुळा उजवा कालवा परिसरात बिबट्याने त्यांच्या दिशेने झडप घालण्याचा प्रयत्न केला. ताके यांनी तत्काळ दुचाकीचा वेग वाढवून कसाबसा बचाव केला.

यानंतर अवघ्या १५ मिनिटांत त्याच ठिकाणी संजय भोरूनाथ जाधव हे पत्नीसह ब्राम्हणीहून घरी येत असताना पुन्हा बिबट्याने झडप टाकण्याचा प्रयत्न केल्याची घटना घडली. सुदैवाने दोघेही सुखरूप बचावले. याच कालावधीत सतिश भारत तरवडे यांनाही बिबट्याचे समोरासमोर दर्शन झाल्याने परिसरात एकच खळबळ उडाली. सलग तीन घटनांमुळे ग्रामस्थांमध्ये भीतीची लाट उसळली आहे. दरम्यान, गुरुवारीच आणखी एक गंभीर घटना घडली. नवनाथ भागवत नवले हे आपल्या मेंढ्यांकडे मुक्कामासाठी वंजारवाडी परिसराकडे जात असताना बिबट्याने त्यांच्या दुचाकीवर झडप टाकली. या हल्ल्यात दुचाकीची सीट फाटली असून बिबट्याने काही अंतर पाठलाग केल्याची माहिती मिळाली आहे. सुदैवाने नवले हेही सुरक्षित राहिले. ताके वस्ती परिसरात गुरुवार रात्री एकाच वेळी तीन बिबटे दिसल्याचा दावा राहुल ताके यांनी केला. त्यामुळे भीतीचे वातावरण अधिक तीव्र बनले आहे.

दरम्यान, शुक्रवारी वनविभागाचे अधिकारी आणि कर्मचारी चेडगावात दाखल झाले. त्यांनी प्रत्यक्ष पाहणी करून ग्रामस्थांशी संवाद साधत परिस्थितीचा आढावा घेतला. ग्रामस्थांनी बिबट्यांच्या वाढत्या दहशतीमुळे परिसरात तातडीने पिंजरे लावावेत व गस्त वाढवावी, अशी ठाम मागणी केली आहे. “कार्यवाही लांबली तर मानवी जीविताला धोका संभवतो,” अशी चिंता ग्रामस्थांकडून व्यक्त केली जात आहे. स्थानिकांच्या माहितीनुसार, बिबट्यांची संख्या किमान तीन असून ते वारंवार मानवी वस्त्यांकडे येत आहेत, त्यामुळे रात्री शेतकरी व नागरिकांच्या हालचालीवर भीषण धोका निर्माण झाला आहे.