बाभुळगाव (प्रतिनिधी – श्री रावसाहेब पाटोळे) : बाभुळगावचे प्रगतीशील शेतकरी रामदास काशिनाथ कोतकर यांचे चिरंजीव राहुल रामदास कोतकर यांची भारतीय सैन्यदलात निवड झाल्याची गौरवशाली बातमी जाहीर होताच संपूर्ण गावात आनंदाचे वातावरण पसरले असून अभिनंदन संदेशांचा वर्षाव होत आहे.
ग्रामीण भागातील एक साधा शेतकरी मुलगा असलेल्या राहुलने अपार मेहनत, जिद्द आणि चिकाटीच्या बळावर सैन्यासारख्या अत्यंत कठीण भरती परीक्षेत यश मिळवत गावाचे नाव उज्ज्वल केले आहे. “जय जवान जय किसान” या घोषणेचा अर्थ उजळवित किसानपुत्र जवान बनत देशसेवेची संधी मिळवणे ही बाभुळगावासाठी अभिमानाची घटना ठरली आहे.
देशसेवा करण्याचे स्वप्न मनात बाळगून लाखो तरुण सैन्यभरतीची तयारी करतात; त्यात निवड होणारे भाग्यवान समजले जातात. बाभुळगावात सैन्य भरतीची परंपरा कायम आहे. गावातील मोजके सैनिक तरुण-तरुणींना सतत प्रेरणा देत आले आहेत. त्याच प्रेरणेने प्रेरित होऊन राहुल कोतकरने स्वतःला सिद्ध करत यश संपादन केले.
राहुलच्या निवडीची बातमी समजताच समस्त गावकऱ्यांनी कोतकर कुटुंबाला भेट देत अभिनंदन केले. गावात उत्साह आणि अभिमानाचे वातावरण असून राहुल कोतकर हा बाभुळगावचा नवा आदर्श ठरला आहे.
Leave a reply
