नगर–मनमाड महामार्गाच्या कामाची खासदार निलेश लंके व माजी मंत्री प्राजक्त तनपुरे यांच्याकडून पाहणी,  तनपुरे यांच्या आंदोलन व उपोषणानंतर राहुरी–फॅक्टरी मार्गावरील कामाला गती

राहुरी (सोमनाथ वाघ ) : राहुरी – शिर्डी–शनीशिंगणापूर या आंतरराष्ट्रीय देवस्थानांना जोडणाऱ्या बहुचर्चित नगर–मनमाड महामार्गाच्या कामाला अखेर गती मिळाली आहे. शुक्रवारी खासदार डॉ. निलेश लंके आणि माजी मंत्री प्राजक्त तनपुरे यांनी राहुरी महाविद्यालयाजवळ सुरू असलेल्या बांधकामाच्या कामाची प्रत्यक्ष भेट देत पाहणी केली. यावेळी दोन्ही जनप्रतिनिधींनी संबंधित विभागातील अधिकाऱ्यांशी सविस्तर चर्चा करून कामाची सद्यस्थिती समाधानकारक असल्याचे नमूद केले आणि काही महत्त्वपूर्ण तांत्रिक मार्गदर्शक सूचना दिल्या.

खासदार लंके म्हणाले, “कुंभमेळा लक्षात घेऊन हा महामार्ग डिसेंबर 2026 पर्यंत पूर्ण करण्याचा संकल्प असून केंद्र पातळीवर सातत्याने पाठपुरावा करून कामाला गती देण्यात आली आहे.” अनेक वर्षे रखडलेल्या या महामार्गाच्या कामात विलंब करणाऱ्या ठेकेदाराला काळ्या यादित टाकत फेरनिविदा काढण्यात आल्या असल्याची माहिती त्यांनी दिली. अधिकाऱ्यांच्या वेळेवर हस्तक्षेपामुळे काम आता सुरळीतपणे मार्गावर असल्याचाही त्यांनी उल्लेख केला. तसेच देहरे येथे उड्डाणपूल मंजूर झाल्याचे खासदार लंके यांनी यावेळी सांगितले.

माजी मंत्री प्राजक्त तनपुरे म्हणाले, “रस्त्याच्या दुरवस्थेमुळे नागरिकांचे जीव जात होते म्हणून आपण रस्ता रोको आंदोलन, उपोषणासह सातत्याने लढा दिला. खासदार लंके यांनीही संसदेत ठाम भूमिका घेतली आणि आज कामाचा वेग प्रत्यक्ष दिसतो आहे.” राहुरी शहरापासून दहा किलोमीटरचा रस्ता तातडीने पूर्ण झाल्याबद्दल समाधान व्यक्त करत तनपुरे यांनी महामार्गावरील अवजड वाहतूक सुरू झाल्यानंतर निर्माण झालेल्या एकेरी कोंडीच्या समस्येवर तात्काळ उपाययोजना राबविण्याची मागणी प्रशासनाकडे केली.

दरम्यान सध्या नगर–मनमाड महामार्गावर सुरू असलेल्या एकेरी वाहतुकीमुळे अपघातांचे प्रमाण मोठ्या प्रमाणात वाढत असल्याची तक्रार प्रवासी तसेच नागरिकांकडून व्यक्त होत आहे. अपघातांना आळा घालण्यासाठी तातडीने ठोस उपाययोजना राबवाव्यात, अशी जनतेची मागणी सातत्याने पुढे येत आहे.