राहुरी प्रतिनिधी (सोमनाथ वाघ) : राहुरी तालुक्यातील मानोरी ग्रामपंचायतीत बुधवार (दि. १९) रोजी झालेल्या विशेष ग्रामसभेत थकीत घरपट्टी करदारांना ५० टक्के सवलत देण्याचा ऐतिहासिक ठराव सर्वानुमते मंजूर झाला. मुख्यमंत्री समृद्ध पंचायत राज अभियानांतर्गत आयोजित या सभेला सरपंच सौ. ताराबाई भिमराज वाघ अध्यक्षस्थानी होत्या. हनुमान मंदिरासमोरील मंडपात भरलेल्या सभेला ग्रामस्थांची मोठ्या संख्येने उपस्थिती होती.
ग्रामविकास अधिकारी संतोष राठोड यांनी करसवलतीसंदर्भातील शासकीय परिपत्रकातील तरतुदी सविस्तर स्पष्ट केल्या. चालू वर्षाची घरपट्टी संपूर्ण भरणे आवश्यक असून मागील वर्षांतील थकीत घरपट्टीवर ५० टक्के सवलत लागू राहील, असा सभेचा निर्णय झाला. मानोरी ग्रामपंचायत १४ गावांच्या सामूहिक पाणीपुरवठा योजनेत असल्याने पाणपट्टीवर सवलत लागू होणार नसल्याचे स्पष्ट करण्यात आले. या निर्णयामुळे सामान्य नागरिकांना दिलासा मिळून महसूल वसुलीला वेग येईल, असा विश्वास व्यक्त झाला.
सभेच्या सुरुवातीला मागील सभेचे इतिवृत्त मंजूर करण्यात आले. त्यानंतर १५वा वित्त आयोग २०२६–२०२७ या वार्षिक विकास आराखड्यावरील विविध प्रस्तावांवर ग्रामस्थांच्या सूचनांच्या आधारे चर्चेनंतर मंजुरी देण्यात आली. रस्ते, गटारे, स्वच्छता, पाणीपुरवठा सुधारणा, प्रकाशयोजना व सार्वजनिक सुविधा यांसारख्या मूलभूत कामांना प्राधान्य देण्यात आले. तसेच दलित वस्ती सुधार योजनेंतर्गत सुविधा आणि मनरेगा अंतर्गत शेततळी दुरुस्ती, पाणी साठवण क्षमता वाढवणे, सार्वजनिक ठिकाणांचे सौंदर्यीकरण व श्रमदान प्रोत्साहन यांना सभेची सकारात्मक मंजुरी मिळाली.
सद्यस्थितीत मानोरी गावाचा पाणीपुरवठा १४ गाव पाणी योजनेतून होत असला तरी पाइपलाईन आरडगावमार्गे जोडलेली असल्याने मानोरीला शेवटी पाणी मिळत असून पुरवठा अपुरा राहत असल्याची तक्रार ग्रामस्थांनी मांडली. या तक्रारीची गांभीर्याने दखल घेत ग्रामसभेत महत्त्वाचा निर्णय घेण्यात आला. मानोरी गावाला शाश्वत आणि पुरेशा दाबाचा पाणीपुरवठा मिळावा म्हणून पाणीपुरवठा योजनेची नवी पाईपलाइन ‘केंद्रळ गावातून’ जोडण्यास एकमताने मंजुरी देण्यात आली. या नव्या जोडणीमुळे पाणीपुरवठा नियमित व स्थिर होईल, असा विश्वास ग्रामपंचायत पदाधिकारी आणि अधिकाऱ्यांनी व्यक्त केला.
सभेत ग्रामपंचायत सदस्य शामराव आढाव, नानासाहेब आढाव, कारभारी बर्डे, सुमन आढाव, दिलशाद पठाण, उत्तमराव खुळे, बापूसाहेब वाघ, ग्राममहसूल अधिकारी सोनाली जराड, कृषी सहाय्यक सारिका हरिचंद्र, मुख्याध्यापक रविकांत सुसे, पोलीस पाटील भाऊराव आढाव तसेच मोठ्या संख्येने ग्रामस्थ उपस्थित होते.
ग्रामविकास अधिकारी संतोष राठोड यांनी शासकीय योजनांची माहिती देत तातडीच्या प्रश्नांची उत्तरे दिली. विकासकामे वेळेत आणि पारदर्शकतेने पूर्ण करण्यासाठी ग्रामस्थांच्या सहकार्याची आवश्यकता असल्याचे त्यांनी सांगितले.
सभेच्या अखेरीस सरपंच सौ. ताराबाई वाघ यांनी ग्रामस्थांचे आभार मानले. ग्रामसभा लोकसहभागातून यशस्वीरीत्या पार पडली असून मानोरीच्या प्रगतीसाठी ग्रामस्थ एकदिलाने काम करतील, असा विश्वास त्यांनी व्यक्त केला.
Leave a reply
