“मुलीचे अपहरण थांबवूया — कुटुंब व्यवस्थेचा सन्मान जपूया” या संदेशासह राहुरीत खास कार्यक्रमाचे आयोजन, राहुरी तालुका कलाकार मंच व केअर संस्था पुणे यांचा संयुक्त उपक्रम

राहुरी प्रतिनिधी (सोमनाथ वाघ) : राहुरी तालुका कलाकार मंच आणि केअर संस्था (पुणे) यांच्या संयुक्त विद्यमाने “गाणी, गप्पा आणि बरंच काही – शब्दसूर” हा आगळावेगळा सामाजिक आणि सांस्कृतिक कार्यक्रम आयोजित करण्यात आला आहे. हा कार्यक्रम रविवार, दि. ९ नोव्हेंबर २०२५ रोजी सायं. ४ ते रात्री १० वाजेपर्यंत पांडुरंग लॉन्स, राहुरी येथे पार पडणार असल्याची माहिती आयोजक समितीच्या वतीने देण्यात आली. या कार्यक्रमाचे उद्दिष्ट राहुरी तालुक्यातील मुलींचे अपहरण रोखणे आणि कुटुंब व्यवस्था अबाधित राखणे या सामाजिक भानाशी जोडलेले आहे. समाजात सकारात्मक विचारांचा प्रसार व्हावा आणि कलावंतांना एक व्यासपीठ मिळावे, हा यामागचा हेतू आहे.

या कार्यक्रमात स्नेहालयचे संस्थापक डॉ. गिरीष कुलकर्णी यांचे प्रेरणादायी विचार आणि राहुरी तालुका कलाकार मंचाच्या सुरेल गाण्यांनी दीपावलीचा आनंद अधिकच द्विगुणित होणार आहे. तसेच “ऑपरेशन मुस्कान – भाग २” अंतर्गत आयोजित ‘खेळ सोशल मीडियाचा, प्रश्न कुटुंब व्यवस्थेचा’ या विषयावरील निबंध, चित्रकला आणि वक्तृत्व स्पर्धेतील विजेत्यांचा सन्मान सोहळा देखील या कार्यक्रमात होणार आहे.

हा उपक्रम राहुरी पोलीस स्टेशन, शिक्षण विभाग, राहुरी तालुका कलाकार मंच आणि केअर संस्था (पुणे) यांच्या संयुक्त विद्यमाने राबविण्यात येत आहे.सर्व नागरिकांसाठी हा कार्यक्रम मुफ्त व खुला असून, फक्त बसण्याची व्यवस्था राखण्यासाठी ‘बुक माय शो’ या ॲपवर विनामूल्य नोंदणी करणे आवश्यक आहे.

📍 नोंदणी लिंक 👇 https://in.bookmyshow.com/events/shabdsur/ET00469866

राहुरी तालुका कलाकार मंच आणि केअर एनजीओ (पुणे) यांच्या समन्वय समितीच्या वतीने राहुरी तालुक्यातील रसिक नागरिक, पालक आणि तरुण वर्गाने या अनोख्या कार्यक्रमाचा आनंद घ्यावा, असे आवाहन करण्यात आले आहे.