‘ऑपरेशन मुस्कान – भाग 2’ अंतर्गत विद्यार्थ्यांमध्ये जागरूकतेचा महाप्रचंड प्रतिसाद, राहुरी पोलिस स्टेशन व शिक्षण विभागाच्यावतीने तालुक्यातील १७,३२९ विद्यार्थ्यांचा सहभाग

राहुरी प्रतिनिधी (सोमनाथ वाघ) : दिनांक १ नोव्हेंबर २०२५ पासून राहुरी पोलीस स्टेशनच्या वतीने “तालुक्यातील कोणत्याही मुलीचे अपहरण होऊ नये, यासाठी जनजागृती” या उद्देशाने ‘ऑपरेशन मुस्कान – भाग २’ ही व्यापक जनजागृती मोहीम सुरू करण्यात आली.या मोहिमेअंतर्गत पंचायत समिती शिक्षण विभाग राहुरी यांच्या संयुक्त विद्यमाने विद्यार्थ्यांसाठी विविध स्पर्धांचे आयोजन करण्यात आले.

“खेळ सोशल मीडियाचा… प्रश्न कुटुंब व्यवस्थेचा” या विषयावर इयत्ता ५ वी ते ७ वी, ८ वी ते १० वी, ११ वी ते १२ वी तसेच पदवीधर स्तरावरील विद्यार्थ्यांसाठी निबंध स्पर्धा, वक्तृत्व स्पर्धा व भित्तीपत्रक (चित्रकला) स्पर्धांचे आयोजन करण्यात आले.आज दिनांक ६ नोव्हेंबर २०२५ रोजी तालुक्यातील सुमारे ७० शाळांमधील तब्बल १७,३२९ विद्यार्थ्यांनी उत्स्फूर्त सहभाग नोंदवत सदर जनजागृती मोहिमेला मोठा प्रतिसाद दिला. अनेक शाळांमध्ये या स्पर्धांच्या वेळी शालेय समिती सदस्य, विद्यार्थ्यांचे पालक व गावातील पोलीस पाटील यांनीही उपस्थित राहून विद्यार्थ्यांना प्रोत्साहन दिले.

सदर उपक्रमाच्या यशस्वी आयोजनासाठी राहुरी पोलीस स्टेशनचे पोलीस निरीक्षक संजय ठेंगे, सहाय्यक पोलीस निरीक्षक सुदाम शिरसाठ, पोलीस उपनिरीक्षक समाधान फडोळ, गणेश वाघमारे, राजेंद्र जाधव, नितीन सप्तर्षी, विष्णू आहेर, सहाय्यक फौजदार तुळशीराम गीते, तसेच पोलीस हवालदार अशोक शिंदे, विजय नवले, संदीप ठाणगे, जयदीप बडे, आजिनाथ पाखरे, सचिन ताजणे, प्रमोद ढाकणे, नदीम शेख, सतीश कुराडे, अंकुश भोसले यांनी विशेष परिश्रम घेतले.

तसेच तालुका गट शिक्षणाधिकारी श्री. मोहनीराज तुंबारे व त्यांचे सहकारी श्री. संतोष गुलदगड (विषय तज्ञ), पंचायत समिती राहुरी, तसेच तालुक्यातील सर्व शाळांचे मुख्याध्यापक, शिक्षक व पोलीस पाटील यांनी या मोहिमेस उत्स्फूर्त सहकार्य दिले. या उपक्रमास माननीय पोलीस अधीक्षक श्री. सोमनाथ घारगे, अप्पर पोलीस अधीक्षक श्री. सोमनाथ वाकचौरे व उपविभागीय पोलीस अधिकारी श्री. जयदत्त भवर यांनी मार्गदर्शन केले.

समाजातील प्रत्येक कुटुंब सुरक्षित, सशक्त आणि सजग व्हावे, हा ‘ऑपरेशन मुस्कान – भाग २’ मोहिमेचा मुख्य हेतू असल्याचे पोलीस प्रशासनाकडून सांगण्यात आले.