बाभुळगाव ग्रामस्थांकडून गणेश तमनरचा गौरव समारंभ उत्साहात संपन्न, राज्यसेवा परीक्षेत यशस्वी होऊन गावाचे नाव उज्ज्वल करणाऱ्या प्रतिभावान युवकाचा सन्मान

बाभुळगाव प्रतिनिधी /  रावसाहेब पाटोळे : बाभुळगाव ग्रामस्थांच्या वतीने राज्यसेवा परीक्षेत उत्तम यश मिळवत वर्ग-१ अधिकारी म्हणून निवड झालेल्या गणेश मंदा रामदास तमनर याचा भव्य नागरी सत्कार जि.प. शाळेच्या प्रांगणात मोठ्या उत्साहात पार पडला. सत्कार समारंभाचे अध्यक्षस्थान रामदास पाटोळे यांनी भूषवले. यावेळी सरपंच, उपसरपंच, चेअरमन, उपचेअरमन, तसेच ग्रामस्थ व महिला वर्ग मोठ्या संख्येने उपस्थित होते.

या समारंभाची शोभा वाढवण्यासाठी गणेश तमनर व त्यांच्या सहकाऱ्यांची आकर्षक मिरवणूक काढण्यात आली. या मिरवणुकीत गणेशचे आई-वडील — श्री. रामदास आणि सौ. मंदाताई तमनर — यांचा सहभाग विशेष ठरला.गणेशचे प्राथमिक शिक्षण ज्या जिल्हा परिषद शाळेत झाले, त्याच शाळेच्या पटांगणात झालेला हा सन्मान सोहळा पाहताना अनेकांच्या डोळ्यात आनंदाश्रू तरळले. त्याला प्राथमिक शिक्षण देणारे शिक्षक — सुनील लोंढे सर, शिवाजी कुलट सर आणि संजय शेळके सर — यावेळी विशेष उपस्थित होते.

गणेश तमनर यांनी आपल्या मनोगतात सांगितले की, “जिद्द, चिकाटी आणि दृढनिश्चय यांच्या जोरावर असामान्य यश संपादन करता येते. इच्छाशक्ती दृढ असेल तर कोणतेही ध्येय अशक्य नाही.” या गौरव सोहळ्याने बाभुळगाव गावात अभिमानाची भावना निर्माण झाली असून, तरुण पिढीसाठी गणेश तमनर प्रेरणास्थान ठरले आहेत.