प्रगती विद्यालयाच्या १९९६-९७ च्या माजी विद्यार्थ्यांचा स्नेह मेळावा उत्साहात संपन्न

राहुरी प्रतिनिधी (सोमनाथ वाघ) – प्रगती विद्यालय, राहुरी येथील सन १९९६-९७ च्या एस.एस.सी. बॅचचा माजी विद्यार्थ्यांचा स्नेह मेळावा अत्यंत उत्साही आणि आनंदी वातावरणात संपन्न झाला. जुन्या आठवणींना उजाळा देत, अनेक विद्यार्थी या मेळाव्याला मोठ्या संख्येने उपस्थित होते.

या कार्यक्रमाच्या अध्यक्षस्थानी त्या बॅचचे वर्गशिक्षक गुरूवर्य लक्ष्मण वखारे सर होते. त्यांच्या उपस्थितीत माजी विद्यार्थ्यांनी एकत्र येऊन सामाजिक बांधिलकी जोपासण्याचा, एकमेकांच्या सुखदुःखात सहभागी होण्याचा आणि समाजात एक आदर्श संदेश देण्याचा संकल्प केला.

या प्रसंगी विद्यालयाचे मुख्याध्यापक अशोक पलघडमल तसेच शिरीष गुणे, भारती विरकर मॅडम, गोरख घोलप सर, आप्पासाहेब तनपुरे, राणी साळवे, गणेश इंगळे, नवनाथ धनवटे, व राजेंद्र जाधव सर आदी मान्यवर उपस्थित होते. अध्यक्षस्थानावरून मार्गदर्शन करताना वखारे सरांनी विद्यार्थ्यांना “व्यसनांपासून दूर राहा, एकत्र कुटुंबव्यवस्था जपा आणि सामाजिक बांधिलकी राखत माणुसकीने वागा,” असा मौलिक संदेश दिला.

सिनेअभिनेता तसेच मा. प्राचार्य शिरीष गुणे सरांनी “आयुष्य सकारात्मक व आनंदी जगा” असे प्रेरणादायी मार्गदर्शन केले. तसेच भारती विरकर, आप्पासाहेब तनपुरे, गोरख घोलप व अशोक पलघडमल यांनीही आपल्या मनोगतातून माजी विद्यार्थ्यांशी संवाद साधला. माजी विद्यार्थी राहुल भागवत, संदिप गुंजाळ, राजेंद्र आडागळे, मच्छिंद्र कुसळकर, मनिषा शिंदे, शारदा दळवी, मिरा गाडेकर, दादा कर्डक, व प्रदीप साळुंके यांनीही आपले मनोगत व्यक्त करत जुन्या आठवणींना उजाळा दिला.

कार्यक्रमादरम्यान माजी विद्यार्थ्यांनी अध्यक्षस्थानी असलेल्या गुरूवर्य वखारे सर, अशोक पलघडमल सर तसेच सर्व मा. शिक्षकांचा पुष्पगुच्छ, गणेशप्रतिमा व शाल-श्रीफळ देऊन सन्मान करण्यात आला. कार्यक्रमाचे स्वागत व प्रास्ताविक अलंकारिक भाषेत संदिप तुपकर यांनी केले. या प्रसंगी संतोष शिंदे, ॲड. बाळासाहेब बाचकर, बाबा साळुंके, प्रविण गोडसे, विनोद निशिगंध, जुम्माभाई शेख, पोपट आयनोर, ज्ञानेश्वर कटारे, संदिप खेमनर, अनिता ठोंबरे, आणि दत्तु उधारे आदी मान्यवर उपस्थित होते.

कार्यक्रमाच्या यशस्वी आयोजनासाठी विजय काकडे, जयवंता शेटे, विशाल तागड, संदिप गुंजाळ, अनुराधा इंगळे, मनिषा शिंदे, व गोपीनाथ शेंडे यांनी परिश्रमपूर्वक नियोजन केले. या कार्यक्रमाचे उत्कृष्ट सूत्रसंचालन अनुराधा इंगळे यांनी केले, तर आभार प्रदर्शन संदिप गुंजाळ यांनी केले. स्नेहमेळाव्याची सांगता सामूहिक ‘पसायदान’ पठणाने झाली.जुन्या आठवणींना उजाळा देत, प्रगती विद्यालयाचे माजी विद्यार्थी पुन्हा एकदा एकत्र येऊन मैत्री, सामाजिक बांधिलकी आणि सकारात्मकतेचा सुंदर संदेश देत कार्यक्रम यशस्वीरीत्या पार पडला.