SR 24 NEWS

जनरल

पिंपरी अवघड येथे जनावरांची चोरी; तीन गायीं गोठ्यातुन केल्या गायब – शेतकरी वर्गात संतापाची लाट

Spread the love

राहुरी वेब प्रतिनिधी : राहुरी तालुक्यातील पिंपरी अवघड गावात शनिवारी मध्यरात्री जनावरांची चोरी झाल्याची धक्कादायक घटना उघडकीस आली आहे. गणेश थोरात या शेतकऱ्यांच्या गोठ्यातून तब्बल तीन दुधाळ गायी अज्ञात चोरट्यांनी पळवून नेल्याने परिसरात भीतीचे वातावरण निर्माण झाले आहे. या घटनेमुळे शेतकरी वर्गात संतापाची लाट उसळली आहे.

मिळालेल्या माहितीनुसार, गणेश थोरात हे आपल्या शेतातील गोठ्यात गायींचे पालन करत असतात. शनिवारी रात्री नेहमीप्रमाणे गायींना चारापाणी करून ते घरी गेले होते. मात्र रविवारी सकाळी गोठ्यातील तीनही गायी गायब असल्याचे त्यांच्या लक्षात आले. त्यांनी तातडीने गावकऱ्यांना माहिती दिली आणि सर्वत्र शोध घेण्यास सुरुवात केली, परंतु गायींचा काहीही मागमूस लागला नाही. तसेच पिंपरी अवघड व गोटुंबे आखाडा परिसरातील काही शेळ्या व बोकड चोरी गेल्याची माहिती समोर आली असून यामुळे नागरिकांमध्ये संताप व्यक्त होत आहे.

घटनेची माहिती राहुरी पोलिसांना देण्यात आली असून पोलिसांनी घटनास्थळी भेट देऊन पंचनामा केला आहे. पुढील तपास राहुरी पोलिस करीत आहे. या चोरीमुळे थोरात कुटुंब आर्थिक अडचणीत सापडले असून, “आमच्या उपजीविकेचा मुख्य आधारच हिरावला गेला,” असे गणेश थोरात यांनी सांगितले. शेतकऱ्यांनी पोलिस प्रशासनाने चोरट्यांना तात्काळ पकडून कठोर कारवाई करावी, अशी मागणी केली आहे.


Spread the love

Leave a Reply

error: Content is protected !!