पारनेर तालुक्यातील ढोकी येथे धान्य कीटनाशक पावडर बेतली जीवावर, दोन लहान चिमुकल्यांचा मृत्यू तर आई बेशुद्ध परिसरात हळहळ

पारनेर विशेष प्रतिनिधी (वसंत रांधवण) : धान्याच्या पावडरीच्या उग्र वासाने चिमुकल्या दोन सख्या लहान मुलांचा मृत्यू झाला. पारनेर तालुक्यातील ढोकी येथे ही हृदयद्रावक घटना रविवारी दि. २९ सप्टेंबर रोजी घडली. त्याबाबत त्या चिमुकल्यांच्या नातेवाइकांनीच तशी माहिती दिल्याचे पोलिसांनी सांगितले. या घटनेत मृत मुलांची आई सोनाली विठ्ठल धरम ( वय २५) या बेशुद्ध झाल्या असून, त्यांच्यावर अहिल्यानगर येथिल खाजगी रुग्णालयात उपचार सुरू आहेत. मृत मुलांमध्ये हर्षल विठ्ठल धरम (वय ५ महिने) व नैतिक विठ्ठल धरम (वय ५ वर्ष) अशी मृत्यू झालेल्या चिमुकल्यांची नावे आहेत. सख्या भावाचा दुर्दैवी मृत्यू झाल्याने परिसरात हळहळ व्यक्त होत आहे.

पोलिसांनी दिलेली माहिती अशी की, शेतकरी विठ्ठल धरम यांनी बाजरीला कीड लागू नये म्हणून गुरुवारी रात्री धान्याची साठवणूक करताना त्यात टाकल्या जाणाऱ्या (सेल्फाॅस) पावडरीच्या उग्र वासाने मुलांच्या आईला व चिमुकल्या दोघांनाही त्रास झाल्याचे नातेवाइकांनी सांगितले आहे.

रविवारी पहाटे प्रकृती खालावल्याने त्यांना खाजगी रुग्णालयात दाखल करण्यात आले. मात्र दोन्ही मुलांची प्रकृती गंभीर झाल्याने त्यांना जिल्हा शासकीय रुग्णालयात हलविले, तेथे उपचारादरम्यान त्यांचा मृत्यू झाला. मृतदेहांवर शवविच्छेदन तपासणी करण्यात आली. 

या घटनेने संतप्त झालेल्या नागरिकांनी आणि ग्रामस्थांनी रविवारी दुपारी ४ : ३० वाजता नगर कल्याण महामार्गावर रास्ता रोको केला. त्यानंतर टाकळी ढोकेश्वर येथिल कृषी केंद्रासमोर एक तास ठिय्या आंदोलन केले. यावेळी टाकळी ढोकेश्वर परिसरात तणावाचे वातावरण निर्माण झाले होते. पोलिस निरीक्षक समीर बारवकर,सपोनि नितीन खंडागळे सहाय्यक फौजदार गणेश डहाळे, पो.कॉ. मच्छिंद्र खेमनर,सागर धुमाळ यांनी घटनास्थळी भेट देत नातेवाईकांशी चर्चा करून परिस्थिती नियंत्रणात आणली. यावेळी मोठा पोलिस बंदोबस्त तैनात करण्यात आला होता. या घटनेने धान्य साठवणुकीसाठी वापरल्या जाणाऱ्या रासायनिक पावडरच्या सुरक्षिततेबाबत प्रश्न उपस्थित झाले असून पोलिसांनी तपास सुरू केला आहे. 

कृषी सेवा दुकानासमोर ठेवले मृतदेह 

मृत नैतिक व हर्षद यांच्यावर ढोकी ग्रामस्थांनी दोन्ही चिमुकल्यांचे मृतदेह कीटकनाशक घेतलेल्या कृषी सेवा दुकानासमोर ठेवून आक्रोश व संताप व्यक्त केला. या घटनेची चौकशीची मागणी केली. पारनेर पोलिसांच्या मध्यस्थीने दोषींवर गुन्हा दाखल करण्याच्या आश्वासनानंतर या दोन्ही चिमुकल्यांवर शोकाकुल वातावरणात रविवारी (दि.२८) सायंकाळी अंत्यसंस्कार केले. रात्री उशिरापर्यंत पारनेर पोलिस ठाण्यात गुन्हा नोंदविण्याचे काम सुरू होते. 

संतप्त नातेवाईकांचा भरपावसात मृतदेहासह ठिय्या 

चिमुकल्यांच्या मृतदेहाच्या शवविच्छेदन तपासणी नंतर संतप्त नातेवाईकांनी मृतदेहासह भर पावसात एक तास टाकळी ढोकेश्वर येथिल कृषी सेवा दुकानासमोर ठिय्या आंदोलन केले. दुकान मालकावर गुन्हा दाखल करण्याची मागणी केली. पोलिस निरीक्षक समीर बारवकर यांनी गुन्हा दाखल करण्याची ग्वाही देत चर्चेअंती हे आंदोलन मागे घेण्यात आले.