राहुरी विद्यापीठ प्रतिनिधी / आर. आर. जाधव : महात्मा फुले कृषी विद्यापीठ, राहुरी येथे २९ जून रोजी निनाद फाउंडेशन संचलित निनाद संगीत विद्यालयात आयोजित ‘स्वरानुभूती’ कार्यक्रम संगीतप्रेमींसाठी पर्वणी ठरला. दोन सत्रांमध्ये झालेल्या या कार्यक्रमात विद्यार्थ्यांच्या सादरीकरणासोबतच आंतरराष्ट्रीय ख्यातीच्या ग्वाल्हेर घराण्याचे प्रसिद्ध गायक पवन श्रीकांत नाईक यांची मैफल रंगली.
गांधर्व महाविद्यालयाच्या परीक्षांमध्ये यश मिळवलेल्या विद्यार्थ्यांच्या गुणगौरवाच्या निमित्ताने व ज्येष्ठ कलावंतांच्या सादरीकरणाच्या हेतूने हा कार्यक्रम पार पडला. कार्यक्रमाची सुरुवात दीपप्रज्वलन व प्रतिमापूजनाने झाली. विद्यापीठाचे कुलगुरू डॉ. शरद गडाख व गायक पवन नाईक यांच्या हस्ते उद्घाटन झाले. याप्रसंगी डॉ. जयंत कुलकर्णी, डॉ. पवन कुलवाल, डॉ. अधीर आहेर, श्री. प्रकाश मोरे, संगीत शिक्षक डॉ. मनोज तेलोरे, राजेंद्र कोतकर आदी मान्यवर उपस्थित होते.
पूर्वार्धात विद्यार्थ्यांची सादरीकरणे प्रभावी ठरली. निरंजन कुसळकर, आदित्य लांडगे, अर्णव कोकणी यांनी समूह तबला वादनातून तीनताल सादर केला.सुबोध गायकवाड याने राग भूप, सिद्धी देवरे हिने राग यमन व भावगीत ‘सांज ये गोकुळी’ सादर केले. भीमपलास रागावर आधारित समूह गायनात सई देशमुख, नम्रता कुसळकर, अक्षरा कुलकर्णी यांनी छोटा ख्याल, सरगम गीत व भजन सादर केले.
‘स्वरानुभूती’ या विशेष सत्रात पवन नाईक यांची जादूई मैफल रंगली. तुम बिन चैन, लट उलझी, भोला शंकर, अलबेला सजन, बाहुली आली, नाई बा कृष्णा, किन्ना सोणा, सासो की माला अशा रचना सादर करत त्यांनी श्रोत्यांना मंत्रमुग्ध केले.राग शिवरंजनी, अहिर भैरव, मिश्र किरवाणी, बिहाग, गौरी आदी रागांतील ख्याल, भक्तिगीते, गवळण, भारूड, सूफी गीतांचे सादरीकरण भावखुलास झाले.
साथसंगतीत कल्याण मुरकुटे (संवादिनी), शेखर दरवडे (तबला), नवरतन वर्मा, संकेत गांधी, श्रेयस शित्रे, पवन तळेकर, जयंत पाठक (सहगायन) यांची उल्लेखनीय कामगिरी होती.कार्यक्रमाचे स्वागत व प्रास्ताविक डॉ. मनोज तेलोरे यांनी केले, सूत्रसंचालन व आभारप्रदर्शन राजेंद्र कोतकर यांनी केले.
कार्यक्रमाच्या यशस्वीतेसाठी सिद्धार्थ साळवे, डॉ. जयंत कुलकर्णी, राजेंद्र नेवासकर, कमलाकर इंगळे, बापूसाहेब तेलोरे, बबन साळवे, महेश बिडवे, सुदाम कोहकडे, शुभदा कुलकर्णी, प्राची गायकवाड, डॉ. खरे, संध्या जोशी, डॉ. कुसळकर आदींचे विशेष सहकार्य लाभले. यावेळी पांडुरंग कुसळकर, भगवान देशमुख, संदीप लांडगे, विवेकानंद कुलकर्णी, नंदकुमार भुते, गणेश गायकवाड, मुकेश कोकणी, दिलीप कुलकर्णी, रविंद्र देवरे, सुभाष घोडके, भाईदास देवरे आदी मान्यवर उपस्थित होते.
Leave a reply
