तुळजापूर प्रतिनिधी (चंद्रकांत हगलगुंडे) : अत्यंत प्रतिष्ठेची आणि चुरशीची म्हणून ओळखली जाणारी नळदुर्ग नगरपरिषद निवडणूक अंतिम टप्प्यात पोहोचत असताना, यंदा प्रथमच नगरपरिषदेत कमळ फुलण्याची शक्यता प्रबळ होत असल्याचे राजकीय वर्तुळासह शहरवासीयांमध्ये दिसून येत आहे. शहरातील गेल्या चाळीस वर्षांपासून प्रलंबित असलेल्या विविध समस्यांचे निश्चित निराकरण फक्त भारतीय जनता पार्टी (भाजपा) करू शकते, असा विश्वास नागरिक व्यक्त करत आहेत.
शहरातील सर्वसामान्य मतदारांच्या अपेक्षा आणि मागण्यांना बळ देण्याच्या दिशेने आमदार राणा दादा पाटील आणि सुनील मालक चव्हाण यांचे नेतृत्व प्रभावी ठरत असल्याचे चित्र दिसत आहे. नळदुर्ग नगरपालिका निवडणुकीत नगराध्यक्ष पदासाठी 6 उमेदवार तर 20 नगरसेवक पदांसाठी 67 उमेदवार रिंगणात असून लढत बहुरंगी झाली आहे. तरीही सामान्य मतदारांचा कल अखेरच्या टप्प्यात भाजपाच्या बाजूला झुकत असल्याचे चित्र स्पष्ट होत आहे.
नगरपरिषद स्थापनेपासून सत्तेवर असलेल्या काँग्रेस आणि राष्ट्रवादीच्या कालखंडात सर्वसामान्यांच्या मूलभूत प्रश्नांकडे योग्य तितके लक्ष न दिल्याची नाराजी लक्षणीय आहे. निवडणुकीत पैशाचा खेळ वाढून नागरिकांच्या दैनंदिन अडचणी गंभीर झाल्याने, यंदाची निवडणूक नागरिकांच्या हक्क व समस्यांशी निगडित असल्याची भावना पसरत आहे.गेल्या दोन ते अडीच वर्षांत पाणीपुरवठा, रस्ते आणि मूलभूत सुविधा विकासासाठी आमदार राणा दादा पाटील यांनी उपलब्ध करून दिलेल्या निधीमुळे नागरिक भाजपाच्या पाठीशी उभे राहत असल्याचे राजकीय समीक्षकांकडून निदर्शनास येत आहे. तालुक्यात पूर्वी काँग्रेस व राष्ट्रवादीचे वर्चस्व असले तरी गेल्या दशकात ‘सबका साथ, सबका विकास’ या धोरणाचा ठसा उमटल्याने तालुक्याचा चेहरामोहरा बदलत असल्याची प्रतिक्रिया मतदारांतून व्यक्त होत आहे.
शहराच्या विकासासाठी निष्कलंक प्रतिमा आणि धरणे कुटुंबाचे योगदान लक्षात घेऊन पक्षाने सर्वसामान्य कार्यकर्त्यास संधी दिल्याने, शहरवासीयांचे प्रश्न मार्गी लागतील, असा आत्मविश्वास मतदारांमध्ये वाढला आहे. नगराध्यक्ष व नगरसेवकांच्या मैदानात स्पर्धा तीव्र असली तरी भाजपाला मिळणारा वाढता सर्वसामान्यांचा पाठिंबा अंतिम टप्प्यात निर्णायक ठरेल असे चित्र स्पष्ट दिसत आहे. त्यामुळे नळदुर्ग नगर परिषदेवर यंदा कमळ फुलण्याच्या दिशेने राजकीय समीकरणे जोरदारपणे फिरत असल्याचे जाणकार व्यक्त करीत आहेत.
Leave a reply
