मुख्यमंत्री देवेंद्र फडणवीस यांची कर्डीले कुटुंबीयांना भेट; मुख्यमंत्र्यांनी स्वर्गीय कर्डीले यांच्या प्रतिमेस पुष्प अर्पण करून वाहिली श्रद्धांजली

बुऱ्हाणनगर (जि. अहिल्यानगर) प्रतिनिधी : माजी मंत्री आणि राहुरी विधानसभा मतदारसंघाचे विद्यमान आमदार स्वर्गीय शिवाजी कर्डीले यांच्या निधनानंतर मुख्यमंत्री देवेंद्र फडणवीस यांनी आज रात्री उशिरा बुऱ्हाणनगर येथे त्यांच्या निवासस्थानी भेट देत कर्डीले कुटुंबीयांना सांत्वन केले. यावेळी मुख्यमंत्र्यांनी स्वर्गीय कर्डीले यांच्या प्रतिमेस पुष्प अर्पण करून त्यांना श्रद्धांजली वाहिली.

मुख्यमंत्री फडणवीस म्हणाले की, “शिवाजीराव कर्डीले हे सहकार, शेती आणि ग्रामीण अर्थव्यवस्थेचे उत्तम जाणकार नेते होते. त्यांनी आयुष्यभर ग्रामीण भागाच्या विकासासाठी अथक परिश्रम घेतले. त्यांच्या निधनाने एक सर्वगुणसंपन्न, लोकहितैषी नेतृत्व हरपले असून राज्याच्या राजकीय आणि सामाजिक क्षेत्रात मोठी पोकळी निर्माण झाली आहे.”

या भेटीप्रसंगी विधानपरिषदेचे सभापती प्रा. राम शिंदे, जिल्ह्याचे पालकमंत्री डॉ. राधाकृष्ण विखे पाटील, पणन व राजशिष्टाचार मंत्री जयकुमार रावल, खासदार मेधा कुलकर्णी, आमदार संग्राम जगताप, आमदार मोनिका राजळे, आमदार विक्रमसिंह पाचपुते, आमदार विठ्ठल लंघे, आमदार राहुल कुल, पद्मश्री पोपट पवार, जिल्हा परिषदेचे मुख्य कार्यकारी अधिकारी आनंद भंडारी आदी मान्यवर उपस्थित होते.

कर्डीले यांच्या अचानक झालेल्या निधनाने राहुरी तालुका तसेच जिल्हा राजकारणात हळहळ व्यक्त होत आहे. त्यांच्या आठवणींना उजाळा देत सर्व स्तरांतून श्रद्धांजली वाहिली जात आहे.