बिलोली तालुक्यातील ३५ गावांच्या स्मशानभूमीचा प्रश्न मार्गी लागणार : खा. डॉ. अजित गोपछडे यांच्या पत्रावरून महसूल मंत्री बावनकुळे यांनी दिले आदेश

नांदेड प्रतिनिधी /धम्मदिप भद्रे : बिलोली तालुक्यातील तब्बल ३५ गावांतील स्मशानभूमीचा दीर्घकाळ प्रलंबित प्रश्न आता मार्गी लागण्याची चिन्हे दिसत आहेत. खासदार डॉ. अजित गोपछडे यांनी या संदर्भात राज्याचे मुख्यमंत्री देवेंद्र फडणवीस यांना पत्र लिहून मागणी केली होती. या पत्राची दखल घेत महसूल मंत्री चंद्रशेखर बावनकुळे यांनी नांदेडचे जिल्हाधिकारी व बिलोलीचे उपजिल्हाधिकारी यांना आदेशपत्र जारी करून तातडीने अहवाल सादर करण्याचे निर्देश दिले आहेत.

पुनर्वसित गावांमध्ये जमीन अधिग्रहणाच्या प्रक्रियेत अडथळे निर्माण झाल्याने ३५ गावांमध्ये स्मशानभूमीची सुविधा उपलब्ध होत नव्हती. त्यामुळे अंत्यविधीसारख्या संवेदनशील कार्यातही नागरिकांना प्रचंड अडचणींना सामोरे जावे लागत होते. अनेक वर्षांपासून हा प्रश्न सुटत नसल्याने नागरिकांमध्ये तीव्र नाराजी होती.

जनतेच्या भावना लक्षात घेऊन खा. डॉ. गोपछडे यांनी या विषयाकडे लक्ष वेधले. त्यांनी मुख्यमंत्री देवेंद्र फडणवीस यांना पाठवलेल्या पत्रात बिलोली तालुक्यातील बोळेगाव, कौठा, कार्ला खुर्द, बाभळी, हुनगुंदा, गुजरी, चिरली, कोळगाव, आरळी, कार्ला बुद्रुक, बाबलगाव, येसगी, गंजगाव, लघुळ, माचनूर, टाकळी थडी, गळेगाव थडी, सावळी, बोरगाव थडी, खतगाव, रामपूर थडी, हिप्परगा थडी, दौलतापूर, तळणी, जिगळा, कुंभारगाव, केरूर, अटकळी, टाकळी खुर्द आदी ३५ गावांमध्ये अत्याधुनिक स्मशानभूमी उभारण्याची मागणी केली होती.

या मागणीवर तातडीची कारवाई करत महसूल मंत्री बावनकुळे यांनी संबंधित अधिकाऱ्यांना आदेश दिले असून, लवकरच अहवाल शासनाकडे सादर होणार आहे. त्यामुळे बिलोली तालुक्यातील ३५ गावांतील स्मशानभूमीची उभारणी होऊन नागरिकांचा दीर्घकाळाचा प्रश्न कायमस्वरूपी मार्गी लागेल, असा विश्वास खासदार डॉ. गोपछडे यांनी व्यक्त केला आहे.