राहुरी नगरपरिषदेला पूर्णवेळ मुख्याधिकारी नसल्याने नगरपरिषदेची अनेक कामे ठप्प : डॉ.सौ.उषाताई तनपुरे

राहुरी प्रतिनिधी ( सोमनाथ वाघ) 13 सप्टेंबर : राहुरी नगरपरिषदेला गेल्या अनेक वर्षांपासून कायमस्वरूपी मुख्याधिकारी नसल्यामुळे नगरपरिषदेच्या विविध विकासकामांना गती मिळत नाही. सध्या नगरपरिषद प्रशासक व प्रभारी मुख्याधिकारी यांच्या ताब्यात असल्याने अनेक महत्त्वाची कामे रखडली आहेत. या गंभीर परिस्थितीवर नगरपरिषद माजी नगराध्यक्ष व ज्येष्ठ नगरसेविका डॉ. सौ. उषाताई तनपुरे यांनी शासनाचे लक्ष वेधले आहे.

डॉ. तनपुरे यांनी सांगितले की, बिहाणी प्लॉट येथील ओपन स्पेसमधील स्विमिंग पूलचे बांधकाम, त्यासमोरील गार्डन, कोर्ट रोडचे काम, भुयारी गटार योजनेअंतर्गत पूर्ण झालेल्या भागातील रस्ते, शहर व वाड्या-वस्त्यांवरील रस्ते बांधकाम, नगरपालिकेच्या मालमत्तेवरील शास्ती माफी योजना राबविणे, घरकुल योजनेतील मंजूर लाभार्थ्यांची थकबाकी हप्त्यांची रक्कम अदा करणे, अनुकंपा व वारसा हक्कावरील रिक्त पदे भरणे, अतिक्रमण धारकांचे पुनर्वसन, मोकाट जनावरांचा बंदोबस्त अशा अनेक कामांची वर्क ऑर्डर निघूनही ती रखडलेली आहेत. काही कामांबाबत शासनाचे थेट निर्देश असतानाही नगरपरिषद प्रशासनाकडून दिरंगाई केली जात आहे.

यामुळे नागरिकांना मोठ्या प्रमाणावर अडचणींचा सामना करावा लागत असून विकासकामांमध्ये अडथळे निर्माण होत आहेत. “नगरपरिषदेवर कायमस्वरूपी मुख्याधिकारी नेमण्यात शासनाने तात्काळ पुढाकार घ्यावा. अन्यथा नागरिकांना सोबत घेऊन नगरपरिषद कार्यालयासमोर तीव्र जनआंदोलन उभारण्यात येईल,” असा इशारा डॉ. तनपुरे यांनी दिला.